Fær ekki bætur eftir árás fyrrverandi

Kona sem slegin var af fyrrverandi unnusta sínum, með þeim afleiðingum að hljóðhimna rofnaði og tönn losnaði, á ekki rétt á bótum úr fjölskyldutryggingu sinni. Þetta er niðurstaða úrskurðarnefndar í vátryggingamálum (ÚNVá).

Fólkið hafði deilt um barnapössun og konan beðið manninn um að víkja af heimilinu. Hann hreytti þá ítrekað ókvæðisorðum í hana og dóttur hennar. Konan brást við með því að ýta manninum sem sló hana á móti með fyrrgreindum afleiðingum.

Í niðurstöðu ÚNVá segir að tryggingin bæti slys sem vátryggður verði fyrir. Undanþegin bótaskyldu séu slys sem vátryggður verði fyrir í handalögmálum. Þar sem ekki þótti sannað að konan hafi ýtt við manninum til að verja sig eða ýta honum af heimilinu var talið að hún hefði staðið í handalögmálum. Því fékk hún ekki bætur.