Lacazette skoraði, Arsenal tapaði en vann samt mótið

Arsenal tapaði 2-1 fyrir Sevilla í Emirates-bikarnum í dag, en eins og nafnið gefur til að kynna fer mótið fram á Emirates-leikvanginum í Lundúnum.

Staðan var markalaus í hálfleik, en Joaquin Correa kom Sevilla yfir á 49. mínútu. Leikmenn Arsenal héldu að Correa væri rangstæður, en svo var ekki.

Alexandre Lacazette jafnaði metin á 62. mínútu þegar hann stangaði boltann í netið úr frákasti, en Steven N'Zonzi tryggði Sevilla sigurinn á 69. mínútu með hnitmiðuðu skoti. Lokatölur 2-1.

Arsenal vann 5-2 sigur á Benfica í gær, en Sevilla vann 1-0 sigur á Leipzig. Leipzig vann svo 2-0 sigur á Benfica í fyrri leik dagsins og endar því Arsenal uppi sem sigurvegari með þrjú stig og flest mörk skoruð.