Flugvélin var á leið til Ameríku: Brotlenti í síðustu ferðinni

„Þetta er eins og að leita að nál í heystakki. Landið var allt undir,“ segir Guðbrandur Örn Arnarson, verkefnisstjóri aðgerðamála hjá Slysavarnafélaginu Landsbjörg.

Vel gekk að finna flugvélina sem hrapaði í Barkárdal á sunnudag. Samhæfingarmiðstöð ríkislögreglustjóra var ræst klukkan 17.06 og rúmum þremur klukkustundum síðar, klukkan 20.29, var vélin fundin.

„Það er samvinna allra viðbragðsaðila sem skilar þessum árangri. Við gerum þetta fræðilega. Vélin fannst innan þess líkindahrings sem við vorum að vinna eftir,“ segir Guðbrandur.

Gat verið hvar sem er

Spurður hvort erfiðara sé að finna flugvél en fótgangandi ferðamenn, í ljósi þess að flugvél kemst yfir mun stærra svæði, segir Guðbrandur: „Það er erfiðara og auðveldara. Flugvél er stór og það getur alltaf komið frá henni reykur eða fundist bensínlykt.“ Litlar vísbendingar voru þó um staðsetningu vélarinnar og því ljóst að hún gat nánast verið hvar sem var.

„Flugvélin fór nokkurn veginn í þann geira sem við gerðum ráð fyrir. Þeir gáfu upp breytingu á flugleið sem skilaði sér í því að við vorum með sterka vísbendingu um hvaða stefna hefði verið tekin frá seinasta þekkta stað.“

Mennirnir tveir, Arngrímur Jóhannsson og Grant Wagstaff, voru báðir reyndir flugmenn. Grant lést inni í vélinni og fannst illa brunninn. Arngrímur komst sjálfur út úr vélinni nokkuð brenndur. Ekkert símasamband var í Barkárdal.

Ekkert neyðarboð

Gunnar Jóhannsson hjá lögreglunni á Akureyri staðfesti að ekkert neyðarboð hefði komið frá flugvélinni. Hann segir að lágskýjað hafi verið víða á svæðinu.

Flugvélin var af gerðinni de Havilland Beaver. Samkvæmt Gesti Einari Jónssyni, framkvæmdastjóra Flugsafns Íslands, var flugvélin að fara í sína síðustu ferð úr landi. Hún hafði verið seld til Ameríku.

„Þeir fljúga þessa leið til Ameríku. Frá Keflavík yfir til Grænlands og hoppa þar á milli.“

Hann segir vélina vera frá 1960. „Hún nauðlenti í Kenía í Afríku árið 1963 og þar lá hún bara,“ segir Gestur. Hann segir vélina hafa verið notaða af breska flughernum.

„Hún liggur þar til 1999 og er þá flutt til Bandaríkjanna, eða það sem eftir var af henni. Hún var endursmíðuð afskaplega vel og vandlega og var talin ein besta flugvél sinnar tegundar í heiminum í dag.“

Vanir menn og varkárir

Gestur segir fjölda flugáhugamanna hafa haft áhuga á vélinni. Hún hefur verið til sýnis á Flugsafni Íslands síðan hún kom hingað til lands árið 2008. Þá flugu Arngrímur og Grant henni til landsins frá Ameríku á átján dögum. „Menn eins og Arngrímur og þessi ágæti maður sem var með honum eru vanir menn og varkárir.“

Hann segir safnið hafa séð eftir flugvélinni. „Vélar eru keyptar og seldar en við sáum eftir henni því hún var óskaplega falleg í safninu og vakti mikla athygli. Við kvöddum þá þegar þeir fóru.“