Vela áfram hjá Real Sociedad

Antonio Griezmann, leikmaður franska landsliðsins og Real Sociedad staðfesti á blaðamannafundi í gær að Carlos Vela, framherji Real Sociedad væri búinn að framlengja samningi sínum til ársins 2018.

Vela hefur verið orðaður við Arsenal og Real Madrid undanfarnar vikur. Vela gekk til liðs við Arsenal aðeins sextán ára árið 2005 var í herbúðum félagsins í sex ár áður en hann gekk endanlega til liðs við Real Sociedad fyrir tveimur árum.

Griezmann var ekki tilbúinn að ræða eigin framtíð en hann hefur einnig verið orðaður við stórlið á borð við Real Madrid, PSG og Manchester United undanfarnar vikur.

Alfreð Finnbogason hefur verið orðaður við Real Sociedad undanfarna daga en hann viðurkenndi í HM-Messunni í gær að það væru yfirgnæfandi líkur á því að hann væri á förum frá Heerenveen í sumar. Alfreð opinberaði að Heerenveen hefur nú þegar hafnað tveimur tilboðum í hann.