Maradona vill sjá tengdasoninn fara til Real Madrid

Diego Maradona er afar hrifinn af þeim plönum að Sergio Agüero, framherji Manchester City, snúi aftur í spænska boltann og gangi til liðs við Real Madrid. Agüero er eiginmaður dóttur Maradona og karlinn ætti því að hafa einhver ítök í stráknum.

Kun Agüero hefur skorað 17 mörk í 27 leikjum á sínu fyrsta tímabili í ensku úrvalsdeildinni og leikmaðurinn sjálfur var fljótur að eyða þeim sögusögnum að hann ætlaði að fara til Real Madrid í sumar

„Kun verður að spila með Real. Þótt að það gangi mjög vel hjá honum með City þá væri það besta fyrir hann í stöðunni að semja við Real Madrid. Hann gerði mistök," sagði Diego Maradona í viðtali við útvarpsstöð í Argentínu.

„Það verður erfitt að ná honum frá City af því að hann er búinn að spila svona vel en við megum samt ekki gleyma því að ef Real vill fá einhvern leikmann þá fá þeir hann," sagði Maradona.

„Þetta snýst ekki um peninga því City á nóg af þeim. Þetta snýst bara um að sannfæra City um að láta hann fara," sagði Maradona.