Birgi mjög brugðið við dóminn í Færeyjum

Birgi Páli Marteinssyni var mjög brugðið í gærkvöldi þegar hann var dæmdur í sjö ára fangelsi fyrir vörslu fíkniefna í Héraðstómi í Færeyjum samkvæmt heimildum færeyska útvarpsins. Færeyska blaðið Dimmalætning hefur eftir Birgi Páli að verst þyki honum að fá ekki að fara aftur til Færeyja - honum finnist hann eiga frekar heima þar en á Íslandi. Í Færeyjum býr afi hans og þar á hann einnig fleiri ættingja.

Birgir Páll er 25 ára. Hann var ákærður fyrir að hafa tekið á móti um fjörutíu kílóum af fíkniefnunum sem síðar voru haldlögð á Fáskrúðsfirði, en hann mun hafa haldið eftir tæplega tveimur kílóum af amfetamíni og e-pilludufti. Saksóknari krafðist í það minnsta tíu ára fangelsins og byggði það á því að maðurinn hafi tekið þátt í undirbúningi og skipulagningu smyglsins. Kviðdómi í Færeyjum þótti það ekki sannað en sakfelldi hann fyrir vörslu efnanna.

Eftir afplánun dómsins er Birgir Páll svo í ævilöngu endurkomubanni. Ekki er hægt að áfrýja niðurstöðu kviðdóms um að maðurinn sé sekur en hægt verður að áfrýja ákvörðun um refsingu til æðra dómsstóls.

Fyrrverandi kærasta hans býr þar einnig en hún var lykilvitni í málinu gegn Birgi Páli. Hún sagði lögreglu frá því að hann hefði haft fíkniefni undir höndum og skilaði einnig til lögreglu bréfum sem hann sendi henni þegar hann var í gæsluvarðhaldi.