Mijatovic: Það voru mistök að leyfa Beckham að fara

Predrag Mijatovic, yfirmaður knattspyrnumála hjá spænska liðinu Real Madrid, viðurkenndi í samtali við breska blaðið The Sun í dag að það hefðu verið mistök að leyfa David Beckham að fara frá félaginu. Hann segir klaufaskap í samningaviðræðunum vera ástæðu brottfarar leikmannsins.

Samningur Beckham við spænska félagið rennur út nú í sumar og hefur hann þegar skrifað undir einn stærsta samning íþróttasögunnar við lið LA Galaxy í Bandaríkjunum. "Í upphafi tímabils vorum við staðráðnir í að halda honum áfram, en við náðum ekki að komast að samkomulagi. Þegar ég lít til baka, hefðum við átt að ræða hlutina umbúðalaust í stað þess að láta fjölmiðla trufla okkur. Ummæli mín, forsetans og umboðsmanns leikmannsins rugluðu alla aðila í ríminu og það var þess vegna sem við gerðum mistök," sagði Mijatovic.