Real í viðræðum við Diego?

Svo virðist sem forráðamenn Real Madrid ætli að eiga það á hættu að vekja reiði enn eins félagsins í Evrópu vegna afskipta af samningsbundnum leikmanni. Spænska blaðið Marca greindi frá því í dag að Real hafi verið í sambandi við brasilíska miðjumanninn Diego hjá Werder Bremen.

Diego hefur leikið einstaklega vel með þýska liðinu í vetur og Marca heldur því fram að leikmaðurinn hafi tekið vel í umleitanir spænska liðsins. Diego er aðeins 22 ára gamall og hóf ferilinn hjá Santos í Brasilíu. Hann lék síðar með Porto í Portúgal og hefur þegar unnið sér inn 16 landsleiki með Brössum. Hann á þó enn þrjú ár eftir af samningi sínum við þýska liðið og því er hætt við því að viðbrögð Þjóðverjanna verði heldur neikvæð við þessum fréttaflutningi.