Eiður Smári elskar lífið í Barcelona

Frank Lampard greindi í dag frá samtölum sem hann hafi átt við fyrrum félaga sinn hjá Chelsea, Eið Smára Guðjohnsen, þar sem Eiður hafi dásamað veru sína í Katalóníu. Lampard viðurkennir að það sé freistandi kostur fyrir knattspyrnumann að spila á Spáni.

"Eiður er búinn að segja mér frá því hvað það sé æðislegt að vera í Barcelona og hann segist elska lífið og lífsstílinn þar í borg. Hann segir mér að fjölmiðlar fylgi leikmönnum bókstaflega í hvert fótmál og greini allt sem þeir geri og ég held að það sé spennandi kostur fyrir alla knattspyrnumenn. Það er líka stór munur á því hvernig menn æfa þar. Hér á Englandi snúast æfingar meira um líkamlegt puð, en hjá Barcelona er meira lagt upp úr tækniæfingum. Það hentar Eiði vel því hann er gæðaleikmaður," sagði Lampard í samtali við blaðið Sport á Spáni. Lampard hefur verið orðaður nokkuð við spænska liðið síðustu ár.