Of góður til að sitja á bekknum

Fótbolti Helsti sérfræðingur Sky-sjónvarpsstöðvarinnar í enska boltanum, Andy Gray, vill að Eiður Smári yfirgefi herbúðir Barcelona og komi aftur til Englands. Hann segir ekkert vit vera í því fyrir Eið að hanga áfram á Spáni.

„Ég segi að hann eigi að fara. Eins og staðan er í dag þá er hann fimmti í röðinni hjá Barcelona og hann var að detta aftar í goggunarröðinni þar sem Henry er kominn til félagsins," sagði Gray við Fréttablaðið en hann hefur ekki trú á því að Eiður spili mikið verði hann áfram á Spáni.

„Þó svo Eiður hafi spilað mikið í fyrra þá verður hann að gera sér grein fyrir að helsta ástæðan fyrir spilatímanum voru meiðsli Eto"os. Eftir að Eto"o kom aftur fékk hann mjög fá tækifæri. Hann er að mínu mati allt of góður til þess að sitja á varamannabekk Barcelona og þó svo það sé eflaust gaman að vera í svona stórliði þá trúi ég ekki öðru en að hann sé eins og ég var og vilji alltaf spila.

Eiður er það góður að hann á að geta styrkt hvaða lið sem er í ensku úrvalsdeildinni," sagði Andy Gray að lokum.