Einn besti dagur í lífi mínu

Jose Antonio Reyes, leikmaður Real Madrid á Spáni, skoraði sitt fyrsta mark fyrir félagið í gærkvöld þegar það lagði Real Sociedad 2-0 á heimavelli sínum. Reyes var að spila sinn fyrsta heimaleik fyrir félagið og sagðist ekki hafa geta beðið um betri byrjun.

"Það var dásamlegt að ná að skora í mínum fyrsta heimaleik hérna á Bernabeu og stór plús að liðið næði líka að vinna. Þetta er einn besti dagur lífs míns. Liðið var ef til vill ekki að spila sinn besta bolta, en við eigum eftir að slípa okkur betur saman og það er mikilvægt að ná í öll stigin sem í boði eru í upphafsleikjunum á tímabilinu," sagði Reyes, sem gekk í raðir Real frá Arsenal sem lánsmaður á dögunum en hann var áður á mála hjá Sevilla á Spáni.