Dómur vegna set- og miðlunarlóns áfangasigur

Héraðsdómur Reykjavíkur felldi í gær úr gildi hluta af úrskurði setts umhverfisráðherra í tengslum við Norðlingaölduveitu. Ráðherra hafði úrskurðað að gerð set- og miðlunarlóns norðan og vestan Þjórsárvera þyrfti ekki að sæta umhverfismati. Lögmaður hópsins sem kærði úrskurðinn segir dóminn áfangasigur.

Það var Áhugahópur um verndun Þjórsárvera sem höfðaði málið á hendur íslenska ríkinu, Skipulagsstofnun og Landsvirkjun. Farið var fram á það að úrskurðIr Jóns Kristjánssonar, setts umhverfisráðherra, og Skipulagsstofnunar vegna framkvæmda við Norðlingaölduveitu yrðu ógiltir.

Í úrskurði ráðherra var lónið minnkað þannig að það yrði utan friðlands Þjórsárvera. Jafnframt var kveðið á um að gert yrði set- og miðlunarnlón norðan og vestan við Þjórsárver og taldi settur umhverfisráðherra að hið nýja lón þyrfti ekki í umhverfismat. Því er héraðsdómur ósammála.

Katrín Theódórsdóttir, lögmaður Áhugahópsins, segir að með dóminu sé það viðurkennt sem skipti stefnendur mestu máli. Þetta sé sögulegur áfangi því hér eftir verði það ekki þolað að framkvæmdaaðilar eins og Landsvirkjun og fleiri ráðist í stórar framkvæmdir og dragi þá hluta framkvæmdanna undan umhverfismati með því að kallar þá mótvægisaðgerðir.

Ekki var hins vegar fallist á kröfu áhugahópsins um ógildingu úrskurðar Skipulagsstofnunar og setts umhverfisráðherra í heild. Katrín segir að ekki hafi verið ákveðið hvort dómnum verði áfrýjað en segir ljóst að samkvæmt dóminum þurfi set- og miðlunarlónið að sæta umhverfismati. Hún sjái ekki að það verði gert án þess að það verði með Norðlingaölduveitu að nýju. Henni sýnist sem svo að það sé bæði andstætt lögum um mat á umhverfisáhrifum, Evróputilskipunum og niðurstöðu Evrópudómstólsins að það sé unnt að búta niður framkvæmdir á sama svæði og það sé metið hvert í sínu lagi.