Gekk berserksgang um borð

Lögreglan á Vopnafirði hafði afskipti af tveimur áhafnarmeðlimum af bát sem liggur við festar í höfninni. Um hálf tvö leytið aðfaranótt laugardags var kallað á lögreglu vegna þess að einn áhafnarmeðlima féll niður stiga um borð í bátnum og var í framhaldi af því fluttur á heilsugæslustöð og síðan með sjúkraflugi til Akureyrar. Á fjórða tímanum var annar skipverji á sama bát handtekinn og fluttur í fangageymslu eftir að hafa gengið berserksgang um borð í bátnum. Mennirnir höfðu báðir verið að skemmta sér í landi áður en atvikin áttu sér stað. Báturinn skemmdist töluvert, meðal annars brotnaði skjár á sjótölvu í brúnni sem þýðir að báturinn kemst ekki til veiða að sinni.