Lögreglan afhendir ekki myndband

Barnaverndarstofa hefur óskað eftir umsögn Persónuverndar vegna tregðu Lögreglustjórans í Reykjavík við að afhenda myndbandsupptökur af skýrslutökum í kynferðisafbrotamálum. Persónuvernd telur ekkert í lögum standa því fyrir þrifum að Barnaverndarstofa fái umrædd gögn en segir jafnframt að það sé ekki á valdsviði sínu að skera úr um skyldu eins stjórnvalds til að afhenda öðru stjórnvaldi gögn. Lögreglustjórinn lítur hins vegar svo á að um sé að ræða viðkvæm sönnunargögn í sakamáli og því verði ríkissaksóknari eða æðra stjórnvald að skera úr þessum ágreiningi.