Viðskipti innlent

281 sagt upp í fimm hóp­upp­sögnum

Atli Ísleifsson skrifar
Unnur Sverrisdóttir er forstjóri Vinnumálastofnunar.
Unnur Sverrisdóttir er forstjóri Vinnumálastofnunar. Vísir/Vilhelm

Fimm tilkynningar um hópuppsagnir bárust Vinnumálastofnun í október 2026. Alls var 281 starfsmanni sagt upp störfum.

Þetta kemur fram í tilkynningu á vef Vinnumálastofnunar. Þar segir að þar af hafi 227 starfsmönnum verið sagt upp á sviði opinberrar stjórnsýslu, 177 hjá ríkisstofnunum og 50 hjá sveitarfélagi. 

Þá hafi 41 starfsmanni verið sagt upp á sviði félagsþjónustu og 13 starfsmönnum í matvælaframleiðslu.

Flestar uppsagnirnar koma til framkvæmda á tímabilinu nóvember 2026 til febrúar 2027.

Meðal hópuppsagna í október eru þá uppsagnir hjá Reykjavíkurborg, en greint var frá því í mánuðinum að stöðugildum hjá Reykjavíkurborg hafi verið fækkað um 74, þar sem fimmtíu starfsmenn fengu beina uppsögn. Þá var greint frá því í mánuðinum að 23 hafi verið sagt upp hjá Hafnarfjarðarbæ.

Með hópuppsögn er átt við uppsagnir atvinnurekanda á fastráðnum starfsmönnum þar sem fjöldi starfsmanna sem sagt er upp á þrjátíu daga tímabili er að minnsta kosti 10 starfsmenn í fyrirtækjum sem venjulega hafa 21-99 í vinnu, minnst 10% starfsmanna í fyrirtækjum með 100-299 í vinnu eða minnst 30 starfsmenn þar sem venjulega eru 300 eða fleiri.

Vinnumarkaður Stjórnsýsla Rekstur hins opinbera

Tengdar fréttir

Sögðu öllum upp á Hjálpartækjamiðstöð SÍ

Öllum starfsmönnum Hjálpartækjamiðstöðvar var sagt upp í gær. Sjúkratryggingar hætta eigin rekstri á verkstæðaþjónustu vegna hjálpartækja og leggja því niður störfin. Fjallað var um málið á vef RÚV í gær en þar kom fram að ákvörðunin væri liður í nýrri stefnu og skipulagi og hún hefði áhrif á sjö stöðugildi.

Sorpa lætur sautján róa

Sorpa framkvæmdi í dag uppsagnir í hagræðingarskyni. Samtals var tíu sagt upp, og tímabundnir samningar við sjö verða ekki endurnýjaðir. Starfsmönnum hjá Sorpu fækkar því um 17, eða um sjö prósent af heildarstarfsmannafjölda.



Mest lesið


Fleiri fréttir

Sjá meira


×

Mest lesið