Verður sjö á móti sex sókn úr sögunni í hand­bolta?

Algengt er að handboltalið taki markmanninn sinn af velli þegar liðið er í sókn og setji annan útileikmann í staðinn inn á völlinn. Við það er liðið með fleiri sóknarmenn á vellinum heldur en varnarmenn andstæðinganna.

Þetta er þó ekki áhættulaust því ef liðið missir boltann með engan markmann þá er markið autt. Þá geta mótherjarnir auðveldlega skorað. Þessi taktík hefur verið gagnrýnd í þó nokkurn tíma hjá áhorfendum og leikmönnum.

Forseti franska handboltasambandsins, sem er jafnframt varaforseti Alþjóðahandboltasambandsins, Philippe Bana, staðfestir við miðilinn handnews.fr að umræða sé innan Alþjóðahandboltasambandsins að banna að hægt sé að spila sjö á móti sex.

Það er þó ekki búið að taka neina ákvörðun um regluna en það spratt upp hugmynd að prófa hana á heimsmeistaramóti unglinga og sjá hvernig það gengur. Ef reglan myndi ganga vel þar þar og gera leikinn meira spennandi þá væri hægt að innleiða hana almennt í íþróttina.