Sættast eftir lætin á Ísafirði og allt dregið til baka

Sindri Sverrisson skrifar 3. október 2026 20:06

Á myndbandi má sjá að Daníel Berg og Braga sinnaðist eftir leikinn á Ísafirði um helgina. Skjáskot/Handboltapassinn

Eftir mikil læti sem urðu á milli þjálfara á leik í 3. flokki karla í handbolta á Ísafirði um helgina, og yfirlýsingar á báða bóga, hafa menn nú náð sáttum og ákveðið að mál sé að linni.

Þetta kemur fram í sameiginlegri yfirlýsingu frá handknattleiksdeild Harðar og þjálfara 3. flokks Stjörnunnar sem er Daníel Berg Grétarsson.

Athygli vekur að handknattleiksdeild Stjörnunnar kvittar ekki undir yfirlýsinguna. Félagið sendi frá sér tilkynningu í vikunni og sagðist þar fordæma atvik sem varð í leik Harðar og Stjörnunnar á Ísafirði á sunnudaginn.

Samkvæmt þeirri tilkynningu veittist Bragi Rúnar Axelsson, aðstoðarþjálfari Harðar, að Daníel og hafði í hótunum við hann. Myndbandið hér að neðan renndi stoðum undir þann málflutning. Kvaðst Stjarnan ætla að vísa málinu til HSÍ.

Forráðamenn Harðar svöruðu þessu með yfirlýsingu og sögðu Stjörnumenn segja ósatt. Þar sagði að Daníel hefði aftur á móti viðhaft ítrekað ljót ummæli í leiknum um leikmenn Harðar, þjálfara og aðstoðarþjálfara.

Nú virðast menn hins vegar hafa náð sáttum og í sameiginlegri yfirlýsingu Daníels og Harðar segir að allar kvartanir vegna málsins hafi verið dregnar til baka. Orð hafi fallið í hita leiksins en aðilar „sammála um að þau voru misskilin og er það miður“.

Yfirlýsinguna má sjá í heild hér að neðan.

Sameiginleg yfirlýsing Harðar og þjálfara Stjörnunnar vegna leiks félaganna í 3. flokki karla

Aðalþjálfari Stjörnunnar og aðstoðarþjálfari Harðar hafa náð fullum sáttum vegna atvika sem urðu í leik liðanna á Ísafirði og eftir hann.

Þeir hafa rætt saman í bróðerni og beðið hvor annan afsökunar. Þeir eru sammála um að allir hefðu átt að vanda samskipti sín betur og þjálfarar eigi öllum stundum að vera fyrirmyndir ungra iðkenda.

Orð féllu í hita leiksins og eru aðilar sammála um að þau voru misskilin og er það miður.

Báðir aðilar hafa jafnframt dregið til baka allar kvartanir sínar vegna málsins og telja ekki tilefni til frekari aðgerða af neinu tagi.

Áfram handboltinn.

Ísafirði og Garðabæ, 3. október 2026

Handknattleiksdeild Harðar

þjálfari Stjörnunnar

Handbolti Stjarnan Hörður