Hörður svarar: „Svo al­var­legar á­sakanir eiga ekki heima í opin­berri um­ræðu“

Handknattleiksdeild Stjörnunnar sakaði þjálfara Harðar um að hafa haft í hótunum og veist að þjálfara Stjörnunnar í leik 3. flokks karla félaganna á Ísafirði um helgina.

Bragi Rúnar Axelsson, starfsmaður Harðar, hafi veist að Daníel Berg Grétarssyni, þjálfara Stjörnunnar, og greindi Handkastið frá því að Bragi hafi hótað Daníel og fjölskyldumeðlimum lífláti.

Handknattleiksdeild Harðar segir í yfirlýsingu þær ásakanir vera af og frá.

„Það er miður þegar fréttir eru sagðar einhliða, eingöngu frá sjónarhóli annars aðilans. Það rýrir fréttagildi þeirra og trúverðugleika,“ segir í yfirlýsingu Harðar. Þar segir jafnframt:

„Hörður hafnar alfarið fullyrðingum um að aðstoðarþjálfari félagsins hafi hótað þjálfara Stjörnunnar eða fjölskyldu hans lífláti. Það er ósatt. Ásökunin kemur frá þjálfara Stjörnunnar einum og ekkert vitni styður hana. Svo alvarlegar ásakanir eiga ekki heima í opinberri umræðu án nokkurrar stoðar. Rétt skal vera rétt. Það er engum til framdráttar að skálda málsatvik,“ segir í yfirlýsingunni sem má sjá í heild neðst í fréttinni.

Þjálfari Stjörnunnar hafi hagað sér ósæmilega

Í ofanálag er áðurnefndur Daníel Berg, þjálfari Stjörnunnar, sakaður um ósæmilega hegðun af Harðarmönnum.

„Samkvæmt vitnum viðhafði þjálfari Stjörnunnar, Daníel Berg Grétarsson, ítrekað mjög ljót ummæli í leiknum um leikmenn Harðar, þjálfara og aðstoðarþjálfara Harðar. Sum ummælin féllu í áheyrn barna og fjöldi vitna var að þessari hegðun hans,“ segir í yfirlýsingunni.

„Að leik loknum kreisti þjálfari Stjörnunnar hönd aðstoðarþjálfara Harðar og ýtti harkalega í bringu hans. Aðstoðarþjálfari Harðar losaði sig frá á klaufalegan hátt. Hann átti ekki að stugga við þjálfara Stjörnunnar. Það var rangt og hann hefur viðurkennt það. Hann bað þjálfara Stjörnunnar afsökunar strax að leik loknum en fékk engin svör,“ segir þar enn fremur.

Önnur tilkynning á borð HSÍ

Stjarnan tilkynnti málið til HSÍ en í yfirlýsingu Harðar segir að Ísafjarðarfélagið muni jafnframt tilkynna meint brot Stjörnumanna til sambandsins.

„Hörður mun tilkynna framkomu þjálfara Stjörnunnar til HSÍ og samskiptaráðgjafa íþrótta- og æskulýðsstarfs. Félagið mun vinna með HSÍ að meðferð málsins í heild sinni og vísar á vitni máli sínu til stuðnings,“ segir í yfirlýsingunni sem má sjá að neðan.

Yfirlýsing handknattleiksdeildar Harðar

Vegna fréttaflutnings og yfirlýsingar Stjörnunnar um atvik eftir leik Harðar og Stjörnunnar 2 í 3. flokki karla á Ísafirði vill félagið koma eftirfarandi á framfæri.

Yfirlýsing Stjörnunnar gefur ekki rétta mynd af því sem gerðist. Það er miður þegar fréttir eru sagðar einhliða, eingöngu frá sjónarhóli annars aðilans. Það rýrir fréttagildi þeirra og trúverðugleika.

Hörður hafnar alfarið fullyrðingum um að aðstoðarþjálfari félagsins hafi hótað þjálfara Stjörnunnar eða fjölskyldu hans lífláti. Það er ósatt. Ásökunin kemur frá þjálfara Stjörnunnar einum og ekkert vitni styður hana. Svo alvarlegar ásakanir eiga ekki heima í opinberri umræðu án nokkurrar stoðar. Rétt skal vera rétt. Það er engum til framdráttar að skálda málsatvik.

Samkvæmt vitnum viðhafði þjálfari Stjörnunnar, Daníel Berg Grétarsson, ítrekað mjög ljót ummæli í leiknum um leikmenn Harðar, þjálfara og aðstoðarþjálfara Harðar. Sum ummælin féllu í áheyrn barna og fjöldi vitna var að þessari hegðun hans.

Að leik loknum kreisti þjálfari Stjörnunnar hönd aðstoðarþjálfara Harðar og ýtti harkalega í bringu hans. Aðstoðarþjálfari Harðar losaði sig frá á klaufalegan hátt. Hann átti ekki að stugga við þjálfara Stjörnunnar. Það var rangt og hann hefur viðurkennt það. Hann bað þjálfara Stjörnunnar afsökunar strax að leik loknum en fékk engin svör.

Aðstoðarþjálfari Harðar er sjálfboðaliði. Launaðir starfsmenn íþróttahreyfingarinnar hafa enga heimild til að veitast að sjálfboðaliðum með hótunum og niðrandi orðum, eins og þjálfari Stjörnunnar gerði í vitna viðurvist, og því síður að ungum leikmönnum annarra liða.

Hörður mun tilkynna framkomu þjálfara Stjörnunnar til HSÍ og samskiptaráðgjafa íþrótta- og æskulýðsstarfs. Félagið mun vinna með HSÍ að meðferð málsins í heild sinni og vísar á vitni máli sínu til stuðnings.

Ungir leikmenn eiga rétt á að allir fullorðnir í kringum leikinn sýni gott fordæmi. Það á við um bæði lið.

Handknattleiksdeild Harðar