„Ég verð aug­ljós­lega að taka þetta tap al­farið á mig“

„Ég er bara stoltur af strákunum. Úr nánast töpuðum leik þegar það voru 5-6 mínútur eftir í það að koma okkur allavega í þessa stöðu. Það var frábærlega gert, en ógeðslega svekkjandi í lokin að ná ekki að klára það,“ sagði Aron í leikslok.

FH-ingar voru að elta svo gott sem allan leikinn, en þrátt fyrir það virtist liðið alltaf hafa trú á því að geta snúið dæminu við.

„Við erum með mikið sjálfstraust sóknarlega og treystum mikið á það þessa dagana. Ég verð líka að gefa liðinu mínu það að þeir gerðu nákvæmlega eins og ég vildi varnarlega í þessum leik. Ég valdi bara vitlaust leikskipulag,“ sagði Aron.

„Það gekk upp það sem ég lagði upp með varnarlega og við vorum að gefa þeim færin sem ég vildi sjá að þeir væru að skjóta úr en þeir bara nýttu þau. Ég verð augljóslega að taka þetta tap alfarið á mig.“

Eins og sönnum Hafnarfjarðarslagi sæmir urði læti í fyrri hálfleik og Darri Aronsson, leikmaður Hauka, fékk að líta beint rautt spjald. Aron gat þó lítið tjáð sig um það sem gekk á.

„Það var einmitt verið að spyrja mig út í þetta og ég mundi ekki einu sinni eftir rauða spjaldinu, það var svo mikið búið að gerast síðan þá. Ég þarf bara að kíkja á þetta aftur því ég man ekki einu sinni hvað hann gerði.“

Þá tekur Aron undir að það virðist vera í eðli viðureigna þessara liða að leita í þá spennu sem við fengum að sjá í lokin.

„Það virðist vera. Fyrst að þessi endaði í svona spennu. Haukunum leið betur en okkur og við þurftum að taka sénsa síðustu fimm mínúturnar. Við sendum tvo menn aðeins framar og reyndum að stytta sóknirnar þeirra, sem gekk upp. Jón Þórarinn var frábær í markinu. Varði nokkra mikilvæga bolta og kom okkur inn í þetta og við nýttum færin vel. Ég er stoltur af því en auðvitað ógeðslega svekktur að tapa.“

Þetta var þó aðeins fyrsta tap FH á tímabilinu og liðið siur í öðru sæti deildarinnar eftir fjórar umferðir.

„Það sem ég tek úr þessum leik er hvað liðið er gott að aðlagast. Við erum með ákveðið kerfi, bæði varnar- og sóknarlega, en gerum litlar breytingar fyrir hvern andstæðing og ég er ógeðslega ánægður með það hvernig leikmennirnir taka það til sín í dag. Mér fannst þetta að mörgu leyti besti leikurinn hingað til, en Haukarnir bara nýttu sína sénsa. Ég þarf að banka hausnum svolítið í vegg út af því, óreyndi þjálfarinn,“ sagði Aron léttur að lokum.