„Meira en tvö stig undir“

„Við erum að sjálfsögðu mjög vel stemmdir. Þetta eru stærstu leikirnir í deildarkeppninni og hvað þá núna þegar bæði lið eru að berjast á toppnum. Þá er þetta ennþá stærra, tvö frábær handboltalið að mætast og leikur sem bæði lið vilja að sjálfsögðu vinna,“ segir Gunnar Magnússon, þjálfari Hauka, í samtali við Vísi en FH og Haukar eru einu taplausu lið deildarinnar eftir fyrstu þrjár umferðir hennar. 

Þú náttúrulega þekkir þennan ríg bara mjög vel frá þínum ferli. Er tilfinningin öðruvísi fyrir leikmenn og þjálfara að halda inn í viðureignir þessara liða?

„Já. Þetta er sjöunda tímabil mitt sem þjálfari Hauka þannig að ég hef farið í nokkuð marga svona Hafnarfjarðarslagi og það er eiginlega alltaf það sama. Ég man ekki eftir öðru en að þetta hafi verið einhver dramatík og jafnir leikir. Það er alveg ótrúlegt hvað þetta leitar alltaf í mikla spennu. Stundum hefur kannski verið smá munur á liðunum í deildinni en það virðist aldrei skipta máli. Nú eru liðin í fyrsta og öðru sæti. Þessir leikir eru mjög sérstakir og alvöru rígur þarna á milli. Það er bara í rauninni meira en tvö stig undir.“

Vilja brjóta þennan ís

Leikur liðanna fer fram í Kaplakrika í kvöld og þar hefur Haukum gengið illa að sækja sigur upp á síðkastið. Síðasti sigur Hauka í Kaplakrika kom í mars árið 2024.

„Við fengum þrjár tilraunir í fyrra til þess að landa sigri þarna og okkur tókst ekki að vinna. Það er alveg klárt mál að þetta er svona einn af þessum punktum sem við viljum bæta frá því á síðasta tímabili. Að ná í sigur í Kaplakrika. Það er auðvitað bara erfitt, erfiður útivöllur, en þetta er svona ákveðin prófraun fyrir mína menn að fara í Kaplakrika og ná í þennan sigur og brjóta þennan ís. Við höfum verið að brjóta fljóta svona ísa síðustu mánuði og þetta er svona einn af þeim sem við þurfum að ná núna, það er að ná í sigur í Kaplakrika, alveg klárt mál.

Þið eruð með fullt hús stiga á toppi deildarinnar fyrir leik kvöldsins eftir þrjár umferðir. Þú hlýtur að vera mjög sáttur með byrjunina hjá ykkur?

„Sáttur með stöðuna á liðinu en auðvitað er bara lítið búið. Mótið er rétt að byrja og við vitum að það verður enginn meistari í september. Gríðarlega mikilvæg stig í boði í kvöld, ekki bara toppsætið og montrétturinn.“

Handbragð Arons sést sífellt betur

Gunnar hefur tekið eftir breytingu á leik FH frá því að Aron Pálmarsson steig inn í þjálfarateymið hjá liðinu.

„Mér fannst kannski meiri breyting svona eftir áramót í fyrra, þá sá maður meira hans handbragð. Svo hefur maður bara séð áframhaldandi þróun á því. Þetta FH-lið er feikilega vel mannað lið, góð blanda af ungum og öflugum leikmönnum með reynsluboltum. Ég veit ekki hversu marga þeir áttu í þessu elítulandsliði á dögunum en það sýnir bara hversu öflugir þeir eru. Auðvitað sér maður handbragð Arons á liðinu og það er auðvitað bara gaman að fá að glíma við hann eins og hefur verið að glíma við FH-liðið síðustu ár.“

Grannaslagur FH og Hauka hefst klukkan hálf átta í kvöld og verður lýst í beinni textalýsingu hér á Vísi.