Mögu­leg enda­lok ferilsins: Hræðist að tapa fyrir eigin­konunni

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fólk fer að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég er venjulega að vakna um klukkan 6 á virkum dögum, en um helgar reyni ég að hvíla mig lengur og njóta augnabliksins – nota aldrei vekjaraklukku nema þegar við eigum flug mjög snemma.“

Hvað er það fyrsta sem þú gerir á morgnana?

„Kaffi fyrst, svo heimsspæjarinn! Ég fæ mér kaffibolla, horfi yfir sjóinn og fylgist með lífinu á höfninni og í miðbænum. 

Það er svo ótrúlega gaman að fylgjast með litlu trillunum og stóru skemmtiferðaskipunum í Hafnarfjarðarhöfn. Svo þarf ég að sinna litla gleðigjafanum á heimilinu, kisunni okkar Múslí. 

Eftir það er kveikt á vinnutölvunni og fjörið hefst.“

Er eitthvað sem hræðir þig þvílíkt á fyndinn hátt?

„Að tapa fyrir konunni í golfi… það myndi þýða endalok golfferilsins hjá mér. Ég er mikill keppnismaður!“

Í hvaða verkefni ertu að vinna helst í þessa dagana?

„Það er nóg um að vera þessa dagana! Við erum á fullu að markaðssetja nýjan og breyttan Fjörð verslunar- og menningarmiðstöð og erum nýbúin að opna glæsilegt bókasafn á annarri hæðinni. 

Við erum líka á fullri ferð að selja glæsilegar íbúðir sem staðsettar eru ofan á Firði – áhugasamir geta kynnt sér þær á 220midbaer.is – ásamt því að reka Strand Hótel Apartments sem er hér á Strandgötunni.

Og svo eru jólin auðvitað farin að banka upp á! Við erum byrjuð að undirbúa jólavertíðina en Jólaþorpið er ein af stærstu hátíðum ársins hér í Hafnarfirði. Algjör skyldumæting er að láta sjá sig í Jólaþorpinu – já, jólin koma snemma hjá okkur.“

Hvernig skipuleggur þú þig í vinnu?

Já, þar sem maður er sýslumaðurinn í Hafnarfirði er margt að sýsla! Þar sem við erum bara tvö í öllum þessum verkefnum er mikilvægt að forgangsraða verkunum og koma þeim niður á blað sem þarf að klárast þann daginn. 

Listann reyni ég oftast að gera áður en ég mæti til vinnu. 

Við skiptum verkefnunum á milli okkar, ég og eldri dóttir mín Guðrún María, en dagarnir eru ófyrirsjáanlegir og við náum sjaldan að klára listann – þá eru kvöldin oft notuð.“

Hvenær ferðu að sofa á kvöldin?

„Hef lengi farið seint að sofa og vaknað snemma, en núna leitast ég við að fara upp í rúm fyrir miðnætti – góður svefn er gulli betri.“