Ég skil ekki nei fólk

Ég skil aftur á móti hvers vegna stórútgerðin, stórfyrirtækin og fjármagnseigendur vilji halda óbreyttu ástandi á Íslandi. Fákeppni sem gerir það að verkum að hægt er að halda uppi hærra vöruverði, ógagnsæi í viðskiptum sem stuðlar að sama. Fjármagnseigendur vilja að sjálfsögðu halda uppi háu vaxtastigi og útgerðin vill að sjálfsögðu ekki rugga þessari þægilegu skútu og þau gera hvort sem er upp í evrum.

Ég skil aftur á móti ekki við hvað venjulegt fólk er hrætt. Fólk sem á ekki fúlgur fjár í banka, er með húsnæðislán þar sem eftirstöðvar hækka um hver mánaðarmót, fólk sem skreppur ekki til útlanda í helgarferð bara af því að því datt það í hug svona seinni partinn á fimmtudegi. Semsagt venjulegir íslendingar sem eru ekki í þessum örfáu prósentum þjóðarinnar sem aldrei hefur þurft að hafa áhyggjur af peningum eða afborgunum um næstu mánaðarmót. Við erum að tala um 80-90% þjóðarinnar.

Ég skil ekki við hvað þetta fólk er hrætt, það hefur engu að tapa.

Nú dynur yfir okkur áróðurinn frá nei liðinu með Morgunblaðið fremst fyrir miðju og kemur það fáum á óvart þar sem Morgunblaðið er málpípa þessara sömu aðila, stórútgerðarinnar, stóru fyrirtækjanna, fjármagnseigenda og þeirra sem eru lengst til hægri í stjórnmálunum. Ákveðnir stjórnmálamenn eru að missa sig í að dæla út hræðsluáróðri og villandi upplýsingum sem allt er á sömu bókina lagt, að rugla fólk í ríminu. Það eru þó mikil vonbrigði en kemur kannski ekki á óvart að fremstur þar í flokki er Ólafur Ragnar Grímsson, okkar gamli forseti. Ruglið sem hann lætur út úr sér er með ólíkindum þegar hann reynir að hafa áhrif á umræðuna, eins og nýlega – að það sé engin trygging fyrir því að samningur verði lagður fyrir þjóðina til samþykktar ef ásættanlegur samningur næst.

Hvað vakir fyrir Ólafi Ragnari annað en að auka á upplýsingaóreiðuna og rugla venjulegt fólk í ríminu.

Ég vona innilega að við glötum ekki þessu tækifæri til að sjá hvernig samning við getum fengið. Ég skora á fólk á mínum aldri, 65 ára og eldra að loka ekki á þann möguleika að unga fólkið fái þetta tækifæri og skila auðu ef það er neikvætt gagnvart þessu samningsferli.

Höfundur er framkvæmdastjóri.