Fjór­tán ára undra­barn spilar með Þor­steini Leó

Hjá Porto er hinn 14 ára Coelho meðal annars með íslenska landsliðsmanninn Þorstein Leó Gunnarsson sem liðsfélaga og gætu þeir því hjálpast að við að búa til mörk í vetur. Coelho er miðjumaður og skiljanlega allur mun léttari og lægri en tröllvaxni Mosfellingurinn.

Coelho, sem verður 15 ára í næsta mánuði, skoraði í frumraun sinni með aðalliði Porto á þriðjudag, í 39-27 sigri gegn ABC Braga í æfingaleik nú þegar styttist í að nýtt tímabil hefjist.

„Auðvitað er þetta draumur sem nú er að rætast,“ sagði Coelho í viðtali á Instagram-síðu Porto eftir frumraunina.

Coelho á ekki langt að sækja hæfileikana en hann er sonur Eduardo Filipe sem fram til ársins 2023 hafði verið leikjahæsti landsliðsmaður Portúgals og átt metið í 23 ár. Filipe lék 271 landsleik en Fábio Magalhaes tók fram úr honum fyrir þremur árum, samkvæmt frétt A Bola.

Coelho er uppalinn hjá Colégio dos Carvalhos en kom árið 2024 til Porto og hefur spilað fyrir yngri lið félagsins og varalið meistaraflokksins. Núna fær hann hins vegar sess í aðalliðshóp Porto sem til að mynda mun spila í Meistaradeild Evrópu í vetur.