Efnt til æfinga í Taí­van fyrir um­fangs­mikið rof á fjar­skiptum

Æfingin var þáttur í árlegri almannavarnaæfingu, þar sem almenningur er þjálfaður í viðbrögðum við tilraunum Kína til að taka landið yfir. Almannavarnaæfingin fer fram á nokkra daga tímabili en í gær var hún haldin í borginni Taichung, þar sem þrjár milljónir íbúa voru látnir leita skjóls og voru svo án netsambands í 30 mínútur.

„Ég tel þetta nauðsynlegt,“ hefur New York Times eftir Yu Chun-hsuan, nema sem leitaði skjóls í matöll verslanamiðstöðvar. „Við erum öll svo háð símunum okkar. Ef það brýst út stríð þá gætu þeir gripið til netárása eða skorið á fjarskipti.“

Kínverjar hafa stóraukið hernaðarumsvif sín í kringum Taívan á síðustu misserum og stjórnvöld á eyjunum hafa ekki síst áhyggjur af því að ef til innrásar kæmi, yrði klippt á fjarskiptastrengi neðansjávar. Þau hafa þegar sakað Kínverja um að hafa skemmt strengi sem liggja milli eyjanna en umfangsmeiri skemmdarverk gætu vakið ugg meðal íbúa og skapað neyðarástand.

Borgaryfirvöld í Taichung sögðu æfinguna hafa gengið vel og að hún hefði ekki haft áhrif á neyðarþjónustu viðbragðsaðila.