Sólmyrkvagleraugun víða upp­seld

„Við fengum auka tíu þúsund gleraugu síðasta föstudag og þau fóru öll á einum degi,“ segir Sævar Helgi í samtali við fréttastofu.

„Við erum uppseldir og fáum ekkert meira í bili,“ segir hann en fyrirtækið er búið að selja í heildina um 300 þúsund gleraugu sjálft á heimasíðu sinni og til fyrirtækja. Hann segir gleraugnasöluna mikilvæga og hann og félagar hans í samtökunum hafi getað sinnt fræðslu og keyptu nýverið sjónauka og gáfu öllum skólum í Reykjanesbæ.

„Í samvinnu við Reykjanes jarðvang, Kadeco og atNorth gagnaverið gefum við í sameiningu öllum skólum á Reykjanesskaga Seestar S30 Pro snjallsjónauka. Kennarar munu sömuleiðis frá námskeið til að læra á sjónaukann og nýta til kennslu, sem og tilbúið námsefni til að nýta hann í. Meðal þess er að mæla snúning sólar, stærð sólbletta, kvartilaskipti tunglsins, stærð gíga og hæð fjalla á tunglinu svo fátt eitt sé nefnt. Sjónaukanum er ætlað að hjálpa til við að efla náttúrufræðikennslu í skólum og kveikja vonandi áhuga nemenda,” sagði hann í færslu í Facebook-hópnum Almyrkvi á sólu 12. ágúst 2026 í gær.

Hann segir „galið“ að hugsa til þess að um 300 þúsund manns verði með gleraugu frá þeim þegar myrkvinn verður á miðvikudag.

Sævar Helgi segir í samtali við fréttastofu að líklega sé enn hægt að fá gleraugu hjá einhverjum fyrirtækjum og verslunum. Hann viti af gleraugum í Forlaginu en við almenna leit blaðamanns á netinu má sjá að þau eru uppseld líka í vefverslun A4 og Elko en eru fáanleg hjá Dynjanda. Sævar Helgi segir þau fylgja með bók sinni Sólmyrkvar og fólk geti því verslað bókina, fræðst um sólmyrkva og fengið gleraugu með.

Sævar Helgi segir auðvitað líka hægt að deila.

„Það gleymist oft,“ segir hann. 

Sveitarfélög eru mörg að gefa börnum gleraugu og eru þau fáanleg á bókasöfnum í Reykjavík og sundlaugum í Hafnarfirði líka. Tryggingarfélög og bankar hafa líka auglýst gleraugu fyrir sína viðskiptavini. Vís greindi þó frá því fyrir helgi að þau hefðu klárast hjá þeim. Þá hefur fjöldi fyrirtækja gefið starfsmönnum sínum merkt gleraugu.