Reglum um stiga­gjöf í bad­min­ton breytt

Fyrr í ár kom BWF með tillögu að reglubreytingum þar sem hugmyndin var að stytta lotuna úr 21 stigi niður í fimmtán stig. Ástæðan fyrir þessu er margþætt og gerði Alþjóðabadmintonsambandið ýmsar rannsóknir með mismunandi stigakerfi en þar kom þetta kerfi best út.

Reglurnar taka gildi á alþjóðavísu árið 2027 en aðildarríkjum er frjálst að taka upp reglurnar fyrr. Tímabilið á Íslandi hefst núna í haust og mun fyrsta mót tímabilsins nota nýja stigakerfið þar sem loturnar eru spilaðar upp í fimmtán. Í fyrra kerfi var leikhlé þegar leikmaður náði fyrst ellefu stigum en í nýja stigakerfinu verður hlé þegar leikmaður er kominn í átta stig.

Í heildina voru þrjár stigagjafir skoðaðar: að halda þáverandi kerfi þar sem vinna þarf tvær lotur upp í 21 stig, nýja kerfið þar sem vinna þarf tvær lotur upp í fimmtán og að vinna þurfi þrjár lotur upp í ellefu.

Fyrri breytingar

Þetta eru ekki fyrstu stigabreytingarnar í badminton en í upprunalegu stigagjöfinni þurfti leikmaðurinn einnig að vinna tvær lotur upp í fimmtán. Þá gat maður þó aðeins fengið stig með því að eiga uppgjafaréttinn sem gerði það að verkum að leikirnir gátu verið mjög langir ef leikmenn skiptust á að vera með uppgjafarréttinn.

Árið 2006 var tekið upp stigakerfi þar sem lotan var upp í 21 en ekki þurfti uppgjafarréttinn til þess að fá stig. Það kerfi hefur fengið að standa nú í 20 ár en það mun víkja fyrir nýja kerfinu um áramótin.

Ákvörðunin um að breyta stigakerfinu er umdeild og hafa stjörnuleikmenn á borð við Lee Chong Wei gagnrýnt ákvörðunina. En þegar sambandsríki BWF kusu um stigabreytinguna voru yfir 80 prósent aðildarríkja sem kusu með breytingunum. Ísland fundaði með Norðurlöndunum þar sem tekin var ákvörðun hvort þau ætluðu að kjósa með eða á móti. Ákvörðunin var að kjósa með.

Badmintonsamband Íslands opnaði fyrir umræður um stigabreytinguna á fésbókarsíðu sinni áður en kosið var. Þar voru ekki margir sem tjáðu sig en þeir sem gerðu það voru flestir á móti reglubreytingunum. Þrátt fyrir það fylgdi kosning Íslands hinum Norðurlöndunum og mun ný stigagjöf taka gildi í haust.

Rökin fyrir breytingunum

Rökin sem BWF færði fyrir reglubreytingunum eru ýmis en stærstu rökin voru að auka fjölda „spennandi“ stiga. Með styttri leikjum skiptir hvert stig meira máli og lotan fer fyrr í hæsta spennustigið sem er undir lok lotunnar.

Þegar spilað var upp í 21 voru oft leikmenn sem þurftu að draga sig úr keppni ef þeir höfðu komist langt í mótinu á undan. Leikmennirnir voru enn að ná sér niður þegar næsta mót hafðist og þurftu að draga sig úr keppni.

Með styttri leikjum verður líkamlegt álag leikmanna minna og því geta bestu leikmennirnir spilað á fleiri mótum og ferill leikmanna jafnvel orðið lengri. Þrátt fyrir að styttri leikur eigi að minnka líkamlegt álag þá hækkar álag á heila leikmanna og krefst leikurinn meiri einbeitingar.

Einnig hjálpar þetta skipuleggjendum móta þar sem auðveldara er að gera ráð fyrir lengd leikja til að halda mótinu smurt gangandi. Í fyrra kerfi var algengt að mót væru á eftir áætlun vegna langra leikja sem ekki var búist við.