Konurnar fyrsta fórnar­lambið eftir út­spil Infantino

Evrópuþjóðirnar hafa samþykkt að sniðganga heimsmeistaramót FIFA fari svo að Gianni Infantino, forseta FIFA, takist að ná í gegnum plön sín um að selja hlut í mótum Alþjóðaknattspyrnusambandsins til einkafjárfesta.

Á fimmtudaginn kusu 55 aðildarsambönd evrópskrar knattspyrnu að sniðganga öll mót FIFA þar til alþjóðaknattspyrnusambandið fellur frá tillögum Infantino.

Fyrst mun reyna á afstöðu UEFA þegar heimsmeistaramót kvenna U20 hefst 5. september í Póllandi. Kvennaknattspyrna verður því sú fyrsta sem líður fyrir það ef áætlun Infantino gengur eftir.

„Fyrstu fórnarlömbin verða knattspyrnumót kvenna. Ég held að FIFA hafi ekki íhugað afleiðingar ákvörðunar sinnar,“ sagði Anita Asante, fyrrverandi varnarmaður enska landsliðsins, í samtali við breska ríkisútvarpið.

Pólska knattspyrnusambandið segir að það hefði ekki fengið neinar upplýsingar um að lið hefðu dregið sig úr keppni og að undirbúningur héldi áfram eins og áætlað var.

Í október byrja svo undankeppnisleikir fyrir heimsmeistaramót kvenna næsta sumar í Brasilíu þar sem Ísland mætir fyrst Króatíu í tveimur leikjum og svo annaðhvort Portúgal eða Norður-Írlandi í úrslitaeinvígi um laust sæti vinnist undanúrslitaeinvígið.

Og heimsmeistaramót kvenna U17 er svo áætlað í október í Marokkó.

„Það er það sem er svo svekkjandi fyrir leikmenn. Þú getur ekki tekið tækifærinu til að spila á heimsmeistaramóti sem sjálfsögðum hlut. Ef þetta leysist ekki fyrir undankeppnisleikina gætu áhrifin orðið gríðarleg og leikjadagskráin er þegar þétt,“ sagði Asante.

Til að bregðast við sniðgöngu UEFA sagði FIFA á föstudag að „enginn væri að selja fótboltann“ og hélt því fram að samráðsferlið hefði verið „truflað af röngum fréttaflutningi“.

Concacaf, sem stjórnar knattspyrnu í Norður- og Mið-Ameríku og hélt heimsmeistaramótið í ár, sagði að 41 aðildarsamband þess hefði „hafnað“ tillögu FIFA.

Knattspyrnusamband Asíu hefur gefið út yfirlýsingu þar sem segir að það „standi í samstöðu“ með starfsbræðrum sínum í Evrópu og Norður-, Mið-Ameríku og Karíbahafi.

Á sama tíma sagði Carlos Cordeiro, háttsettur ráðgjafi Gianni Infantino, yfirmanns FIFA, af sér og sagði tillöguna vera „slæman samning fyrir fótboltann“ og að hún myndi „veðsetja framtíð fótboltans“.

„Ég var mjög ánægð að sjá að UEFA hefði tekið þá afstöðu sem það gerði, og þau voru mjög skýr með fyrirmæli sín og ákveðin í því hvernig þau vilja að þetta fari,“ bætti Asante við.