Barna­barn Idi Amin keppir á Sam­veldis­leikunum: „Verð nýr konungur Skot­lands“

Hinn 25 ára Abdul mætir Damar Thomas í átta manna úrslitum í ofurþungavigt á Samveldisleikunum á miðvikudaginn.

Abdul er ekki eini boxarinn í fjölskyldunni því afi hans, Idi Amin, var sjálfur liðtækur í hringnum. Hann er þó þekktari fyrir að stjórna Úganda með harðri hendi á árunum 1971-79. Talið er að í stjórnartíð hans hafi allt að hálf milljón manns verið myrt.

Abdul hefur mikið álit á afa sínum og segist nota líf og störf hans sem hvatningu. 

„Árangur afa míns veitti mér innblástur. Hann var þungavigtarboxari eins og ég og ég er svo stoltur af honum. Ljón ala af sér ljón. Ljón getur ekki alið af sér hund eða úlfalda. Ljón verður að líkjast ljóni. Þetta er bara svona. Ég er sannur stríðsmaður. Ég er sonarsonurinn,“ sagði Abdul kokhraustur.

Amin var hugfanginn af Skotlandi og kallaði sig Konung Skotlands. Það er einnig nafn á kvikmynd þar sem Forest Whitaker fór með hlutverk einræðisherrans. Adbul vonast nú til að geta sigrað Skotland þar sem Samveldisleikarnir fara fram.

„Ég er mjög ánægður með að berjast við Englending. Ég hef beðið eftir þessu augnabliki í þrjú ár. En nú erum við ekki í Afríku heldur í Evrópu. Eins og afi minn sagði alltaf, þá verður maður að vinna með rothöggi, þannig að það er það sem við höfum æft og það er það sem ég vonast til að gera,“ sagði Abdul.

„Ég þekki bresku þungavigtarkappana Anthony Joshua og Tyson Fury en fyrirmyndin mín er Mike Tyson: grimmasti maður jarðar. Ef ég vinn gullverðlaunin verð ég grimmasti maðurinn í Samveldinu, grimmasti maðurinn í Glasgow og nýr konungur Skotlands.“

Ef hinn 25 ára Abdul sigrar Thomas eftir tvo daga mætir hann annað hvort Ganverjanum Daniel Plange eða hinum norður-írska William John McCartan í undanúrslitum ofurþungavigtarinnar.