Hleypur yfir alla Alpana á met­tíma

Hún setti sér það markmið að vera sú fljótasta til að hlaupa í gegnum allan hæsta og stærsta fjallgarð Evrópu. Þá erum við ekki að tala um að fara yfir Alpana heldur hlaupa í gegnum þá alla.

Sophie Grant er nú búin að hlaupa í sextán daga og stefnir á að hlaupa yfir alla Alpana á mettíma.

Grant mun hlaupa frá Trieste á Ítalíu til Mónakó, fara í gegnum átta lönd og hlaupa að meðaltali 63 kílómetra á dag með klifri sem jafngildir því að fara upp Mont Blanc á stærstu dögunum.

Allt gerir hún þetta á aðeins nokkurra klukkustunda nætursvefni með það markmið að setja nýtt met.

Kvennametið er 38 dagar en karlametið er 35. Hún stefnir á að klára hlaupið á 30 dögum og er á góðri leið með að ná báðum metunum.

Núna er hún hálfnuð með hlaup sitt um Alpana á methraða og þrátt fyrir að takast á við eina líkamlega og andlega erfiðustu þrekraun sem hægt er að hugsa sér segir Grant við Her Sport að hún sé í góðum gír.

„Fyrstu vikurnar voru erfiðar og mér var illt alls staðar. Mér er ennþá illt á ýmsum stöðum og í lok dags eru fæturnir á mér svo sannarlega tilbúnir í hvíld, en eins og er er ég bara með eina litla blöðru á hælnum, sem ég tel vera stórsigur. Þegar allt er tekið með í reikninginn líður mér mjög vel,“ sagði Sophie Grant.

Markmið hennar var að skora á sjálfa sig, verða aftur ástfangin af hlaupum eftir erfitt tímabil í lífi sínu og hvetja aðrar konur til að þora að reyna að fara lengra en þær telja sig geta farið.