Hefur fundið lausn á vanda­málinu í Belgíu

George Russell datt úr keppni á fyrsta hring belgíska kappakstursins og datt niður í þriðja sæti heimsmeistaramóts ökumanna í Formúlu 1. Hann var nú þegar búinn að vera á afturfótunum alla helgina þegar hann lenti í samstuði við Lewis Hamilton á fyrsta hring og endaði keppnina sína snemma.

Russell vildi meina að ástæðan fyrir bæði slæmu gengi og samstuðinu við Hamilton væri að vélin hans hefði hökt á hraðasta kafla brautarinnar. Í vikunni hefur hann unnið náið með verkfræðingum Mercedes og telur nú að liðið sé búið að leysa vandamálið.

Eftir ungverska kappaksturinn um helgina kemur mánaðar sumarfrí og stefnir Russell á að fara í sumarfríið á góðum nótum. Bardaginn við liðsfélaga hans hjá Mercedes, Kimi Antonelli, hefur tekið á andlega fyrir Russell. Í byrjun móts var hann talinn sigurstranglegastur til að verða heimsmeistari en frábær akstur Antonelli hefur sett strik í reikinginn. Einnig hefur Mercedes-bíllinn bilað á óheppilegum tímum og hefur þetta tvennt gert það að verkum að Russell er einungis í þriðja sæti heimsmeistaramótsins.

„Tímabilið hefur farið mikið upp og niður. Bæði hlutir sem ég ræð við og ræð ekki við hafa ekki fallið mér í hag og hægt á framförum mínum og bílsins,“ sagði George Russell í viðtali við Sky Sports.

Mikil barátta er í efstu þrem sætunum og enn er fullt af stigum í pottinum þar sem tímabilið er aðeins að verða hálfnað. Kimi Antonelli situr í efsta sæti mótsins en 45 stigum fyrir aftan hann er Lewis Hamilton. Þar á eftir í þriðja sætinu situr George Russell en aðeins fimm stig skilja þá að. Það munar því aðeins 50 stigum á fyrsta og þriðja sæti en fyrir að vinna kappakstur fær maður 25 stig.