Antonelli skákaði Hamilton í sprettkeppninni

Gengi Kimi Antonelli, ökumanns Mercedes, heldur áfram að vera frábært eftir að hafa sigrað sprettkeppnina í breska kappakstrinum í dag. Kimi Antonelli byrjaði keppnina í öðru sæti með Lewis Hamilton fyrir framan sig.

Þetta er uppáhaldsbraut Hamilton en hann hefur unnið breska kappaksturinn níu sinnum sem er meira en nokkur annar. Það dugði þó ekki í sprettkeppninni í dag og þurfti hann að sætta sig við annað sætið.

Fyrir utan toppslaginn var sprettkeppnin frekar tíðindalítil og ljóst að flestir ökumenn voru að passa upp á bílana sína fyrir tímatökur kappakstursins sem hefjast seinna í dag.

Kimi Antonelli stefnir á að auka forskot sitt í heimsmeistaramóti ökumanna í Formúlu 1 en hann er með 43 stiga forskot á George Russell í öðru sætinu.