Voni að allir fái starfið aftur

Greint var frá því á Vísi í gær að til standi að segja öllu starfsfólki hótelanna tveggja upp í næstu viku. Um þrjú hundruð starfa á hótelunum tveimur. 

Hilton og Natura-hótelin eru bæði í eigu Reita fasteignafélags og hefur Berjaya haft þau í leigu. Þar sem að áframhaldandi samningar náðust ekki tekur Íslandshótel við þeim þann 1. september.

„Rétt er að taka fram að um ræðir samkomulag á milli Reita fasteignafélags og félagsins um lok leigusamninga á tveimur fasteignum, sem er frá og með 1. september 2026, verða ekki lengur hluti af leigusamningum Berjaya á Íslandi,“ segir í fréttatilkynningu frá Berjaya.

Þar segir að það hafi verið eindreginn vilji félagsins til áframhaldandi leigu en ekki hafi náðst samningar við Reiti um áframhaldandi leigu. Beryaja muni halda áfram óbreyttum rekstri hótelanna til 31. ágúst og síðan hætta rekstri þar. Þann 1. september taka Íslandshótel við.

Annar starfsmannafundur í dag

„Þar sem félagið verður ekki áfram leigutaki að umræddum fasteignum neyðist félagið til að grípa til erfiðra aðgerða og ljúka ráðningarsambandi við starfsfólk á þessum tveimur starfsstöðvum, sem hluti af formlegu ferli sem þarf að eiga sér stað í ljósi þessarar stöðu,“ segir í tilkynningunni.

Tekið er fram að uppsagnirnar eru framkvæmdar í samræmi við ráðgjöf lögfræðinga Berjaya og í nánu samstarfi við trúnaðarmenn stéttarfélaga. 

Starfsmannafundir hafi verið haldnir á báðum hótelum í gær og í dag þar sem rætt var við starfsfólk. Þeir starfsmenn sem fréttastofa ræddi við í kjölfar fundarins í gær voru óánægðir með svörin sem fengust á fundinum og upplifðu margir sig yfirgefna af fyrirtæki sem sum hver höfðu unnið fyrir í mörg ár.

Davíð Torfi Ólafsson, forstjóri Íslandshótela, sagði í hádegisfréttum Bylgjunnar að hann hefði viljað að staðið hefði betur að hópuppsögninni. Hann gerir ráð fyrir því að ráða allt fólkið aftur til starfa.

„Við höfum alveg verið skýr með það og viljum að það komi skýrt fram að við viljum koma fram við þetta fólk sem vinnur á hótelunum af virðingu. Við erum í góðu samtali við trúnaðarmenn á hótelunum, góðu samtali við stéttarfélögin og það er bara þannig að öllu þessu fólki verður gefinn kostur á að koma í samtal við okkur og við gerum ekki ráð fyrir öðru en að ráða allt þetta fólk inn,“ sagði Davíð.

Forsvarsmenn Berjaya taka fram í tilkynningunni að þrátt fyrir breytingarnar sé Iceland Hotel Collection by Berjaya áfram eitt stærsta hótelfélag landsins með ellefu hótel og um sex hundruð starfsmenn víðs vegar um landið.

Fréttin hefur verið uppfærð. Fyrst um sinn stóð að fréttatilkynningin væri frá Reitum en rétt er að hún kom frá Berjaya.