Hetjan Einar sleginn í punginn: „Svona á ekki heima á handboltavelli“

Einar Bragi var hetja Kristianstad sem vann Alingsås í framlengdum leik, 36-33, og tryggði sér þar með oddaleik á heimavelli í undanúrslitum sænsku úrvalsdeildarinnar.

Mikill hiti er kominn í einvígið en ljóst er að Samuel Lindberg, leikmaður Alingsås, gekk of langt þegar hann sló Einar Braga í punginn eins og sjá má hér að neðan.

Lindberg mætti í viðtal í hálfleik og kenndi Einari Braga um með því að hafa verið „uppi í andlitinu“ á honum eftir að Lindberg hafði klúðrað vítakasti:

„Ég hugsaði með mér: Hættu,“ sagði Lindberg sem slapp við rautt spjald þar sem að dómarar leiksins sáu ekki atvikið.

Sjá allir hvað gerðist

Kristianstadsbladet spurði Einar Braga út í atvikið eftir leik en hann var fámáll um það. „Í dag fáið þið ekkert frá mér um þetta. Ég kýs að segja ekki neitt,“ sagði Einar Bragi. Aðspurður hvort það væri vegna þess að enn væri einn leikur eftir í einvíginu svaraði hann:

„Ég skal segja eitt í viðbót: Það sjá allir á myndbandinu hvað gerðist,“ sagði Einar Bragi.

Þjálfarinn Anders Hallberg útilokaði ekki að atvikið yrði kært og að Lindberg yrði í leikbanni á föstudaginn.

„Þetta er ekki í fyrsta sinn sem að þeir verða uppvísir af svona höggum. Mér finnst svona lagað alls ekki eiga heima á handboltavelli,“ sagði Hallberg.

Fékk innblástur frá FH-ingum

Einar Bragi skoraði sjö mörk í leiknum og í umfjöllun Kristianstadsbladet segir að hann hafi ráðið úrslitum í framlengingunni, sem Kristianstad vann 6-3, meðal annars með algjörri rakettu einni og hálfri mínútu fyrir leikslok.

Sjálfur sagði Einar FH hafa veitt sér innblástur til að vinna leikinn og ljóst að hann fylgist grannt með úrslitaeinvígi sinna gömlu félaga gegn Val sem lýkur einmitt með oddaleik í kvöld.

„Ég sat og horfði á mitt gamla lið FH sem var 2-1 undir í íslenska úrslitaeinvíginu. Þeim tókst að vinna eftir framlengingu og jafna í 2-2 og þá hugsaði ég með mér: „Það munum við einnig gera“,“ sagði Einar.