Sagan skrifuð í Lúndunamaraþoninu: „Urðum vitni að ein­hverju ó­trú­legu“

Hinn keníski Sawe kom í mark í Lundúnamaraþoninu á einni klukkustund, 59 mínútum og þrjátíu sekúndum. Hann bætti heimsmet landa síns, Kelvins Kiptum, um rúmlega mínútu.

„Mér líður vel. Ég er svo glaður. Þetta er eftirminnilegur dagur,“ sagði Sawe eftir að hann kom í mark. „Við byrjuðum hlaupið vel. Þegar leið á hlaupið fannst mér ég vera sterkur. Þegar ég nálgaðist endamarkið sá ég tímann og varð spenntur.“

Sawe hljóp fyrri hluta maraþonsins í dag á einni klukkustund og 29 sekúndum. Hann gaf enn meira í seinni hlutann og kom í mark á undir tveimur klukkustundum. Sawe var reyndar ekki sá eini sem afrekaði það í dag því Yomif Kejelcha frá Eþíópíu hljóp á 1:59:41 í sínu fyrsta maraþoni á ferlinum.

Fjórfaldi Ólympíumeistarinn Sir Mo Farah átti vart orð til að lýsa afreki Sawes.

„Við höfum beðið nógu lengi eftir að sjá mann hlaupa maraþon á undir tveimur tímum. Þetta hefur alltaf verið spurningin sem við höfum spurt okkur. Við urðum vitni að einhverju ótrúlegu,“ sagði Farah.

Sawe hefur unnið öll fjögur maraþonin sem hann hefur tekið þátt í, þar af Lundúnamaraþonið í tvígang. Hann bætti sitt persónulega met um tvær mínútur og 23 sekúndur í dag.

„Ég vil þakka áhorfendum fyrir að hvetja okkur áfram. Þeir hjálpa okkur mikið því án þeirra finnst okkur við ekki vera eins elskaðir. Þess vegna segi ég að það sem gerðist í dag er ekki bara fyrir mig heldur alla í London,“ sagði Sawe.