Langur samningur og krafan er skýr

„Ég er mjög sáttur og við öll sem komum að þessari ráðningu,“ segir Jón Halldórs­son, for­maður HSÍ. „Við vildum semja til lengri tíma. Búa til ákveðið jafn­vægi í kringum lands­liðið okkar, horfa til lengri tíma. Við erum mjög sátt. Bæði með lengd samningsins sem og þjálfara­t­eymið okkar sem hefur staðið sig frábær­lega.“

Viðræðurnar hafi ekki reynst erfiðar.

„Alls ekki erfiðar og við strönduðum ekki á neinu. En það voru fullt af hlutum sem við vildum ræða. Þegar að maður gerir svona langan samning þá þarf maður að reyna að horfa fram í tímann og sjá hvað gæti komið upp. Viðræðurnar snerust að lang­mestu leiti að þessum fag­lega þætti. Þar sem það var vilji frá öllum aðilum að halda sam­starfinu áfram þá vorum við ekkert endi­lega að drífa okkur. Vildum frekar vanda til verka og skila þessum góða samningi fyrir HSÍ og fyrir þjálfarana að lokum.“

Heiður númer eitt, tvö og þrjú

Rætt hefur verið um áhuga er­lendis frá á kröftum bæði Snorra og Arnórs frá félags- og lands­liðum. Jón hafði hins vegar ekki áhyggjur af því að öðrum tækist að lokka þjálfarana af landi brott.

„Ég hafði ekki áhyggjur en auðvitað er það þannig þegar að það næst árangur þá verða þjálfararnir vinsælli. Við sjáum það á um­ræðunni sem fór á kreik fyrir tveimur vikum varðandi danska lands­liðið og Arnór. Það er nú kannski bara heiður fyrir okkur nú­mer eitt, tvö og þrjú að það sé sóst í þjálfarana okkar. Það góða við þetta er að við vorum allir með heilan hug við það að ís­lenska lands­liðið væri í for­grunni. Þeir vilja þjálfa ís­lenska lands­liðið. Finnst það heiður. Það er bara gott, þannig viljum við hafa það.“

Krafan frá HSÍ í garð Snorra sé að skila medalíu í hús.

„Það er skýr krafa. Al­gjör­lega skýr krafa að við viljum ná árangri. Við erum með frábært lið. Ætlum okkur að vera keppa við bestu lið í heimi. Medalía er eitt­hvað sem okkur langar í.“