Stjarnan og Hörður berjast um sæti í Olís deildinni

Leikur dagsins var spennandi allt frá upphafi til loka hans. Aðeins eitt mark skildi liðin að 12-11 eftir fyrri hálfleikinn og sami fjöldi marka skildi liðin að þegar að rúmar þrjár mínútur eftir lifðu leiks. 26-25. 

Þá tók við góður kafli hjá Stjörnumönnum á akkúrat rétta tímanum þar sem að liðið komst þremur mörkum yfir og sigldi sigrinum heim, 30-27.

Stjarnan sneri einvíginu við eftir tap í fyrsta leik og hefur nú tryggt sér úrslitaeinvígi gegn liði Harðar frá Ísafirði sem sópaði Gróttu í undanúrslitaeinvígi liðanna. 

Fyrsti leikur Stjörnunnar og Harðar frá Ísafirði fer fram á miðvikudaginn kemur í Heklu Höllinni í Garðabæ.