Elín Klara marka­hæst og undanúr­slit blasa við

Sävehof varð deildarmeistari á meðan að Skuru endaði í 8. sæti og nú er allt útlit fyrir að það verði Sävehof sem fer áfram í undanúrslitin.

Liðið er komið í 2-0 í einvíginu en vinna þarf þrjá leiki til að komast áfram. Liðin þurfa þó að bíða fram yfir landsleikjahlé eftir næsta leik sem fram fer 16. apríl. Í millitíðinni stefnir Elín Klara á að koma Íslandi á Evrópumótið með sigrum gegn Færeyjum og Portúgal.

Elín Klara var markahæst í sigri Sävehof í kvöld en þar hjálpaði reyndar til að hún sá um að taka vítin. Hún skoraði tvö mörk úr fimm skotum í opnum leik en úr fjórum af fimm vítaköstum sínum, eða alls sex mörk.