Haukur í liði um­ferðarinnar eftir að hafa komið að 23 mörkum í sama leiknum

Haukur skoraði fimmtán mörk úr átján skotum gegn Wetzlar. Átta af mörkunum komu úr vítaköstum. Auk þess gaf Haukur átta stoðsendingar og tapaði boltanum aldrei í leiknum.

Það þarf því kannski ekki að koma mikið á óvart að sjá Hauk í liði umferðarinnar í þýsku úrvalsdeildinni. Samherji hans hjá Löwen, danski markvörðurinn Mike Jensen, er einnig í úrvalsliðinu. Hann varði fimmtán skot gegn Wetzlar, eða helming þeirra skota sem hann fékk á sig.

Löwen er í 7. sæti deildarinnar með 31 stig. Liðið hefur fengið fimm stig af sex mögulegum í síðustu þremur leikjum sínum.

Haukur hefur spilað stórvel á sínu fyrsta tímabili með Löwen og er langstoðsendingahæstur í þýsku deildinni. Hann hefur gefið 140 stoðsendingar, 21 fleiri en samherji sinn í íslenska landsliðinu, Gísli Þorgeir Kristjánsson.

Þá er Haukur níundi markahæsti leikmaður þýsku deildarinnar með 146 mörk. Mathias Gidsel, leikmaður Füchse Berlin, er markahæstur með 238 mörk. Landsliðsfyrirliðinn Ómar Ingi Magnússon er í 3. sæti markalistans með 186 mörk.