„Er eigin­lega bara enn þá að með­taka þetta“

„Ég er eiginlega bara enn þá að meðtaka þetta. Þetta er mjög stórt og ég er ekki alveg að átta mig á hversu stórt þetta er,“ segir Elísa í Sportpakkanum á Sýn í gær.

„Ég var búin að setja upp plan sem að var upp á 6:30 en ég var líka búin að segja við sjálfa mig að það væri eiginlega óraunhæft. Svo enda á 6:22 klst, eitthvað sem ég var aldrei að búast við,“ segir Elísa sem hljóp nánast allar sex klukkustundirnar í einni beit.

„Það eru 3.000 hæðarmetrar í þessu en þetta eru mjög aflíðandi og þægilegar brekkur til þess að hlaupa. Ég hægði bara mjög lítið á mér.“

Frá Tene til Flórens

Umrætt hlaup fór fram í Flórens á Ítalíu en hún átti að vera að hlaupa á Tenerife.

„Það er alveg ár síðan ég skráði mig í það hlaup og ég var mjög spennt að fara að hlaupa á Tenerife. Ég hljóp þetta hlaup í fyrra á Tenerife og ég villtist í brautinni. Svo er ég að fara út bara á miðvikudagsmorgni og hlaupinu er kanselað á þriðjudagskvöldi. Þannig að ég hef samband við þetta hlaup á Ítalíu og fæ miða þar inn og á miðvikudagsmorgni er ég bara í flugvél á leiðinni til Ítalíu.“

Með sigrinum um helgina hefur hún tryggt sig inn á annað stórt hlaup.

„Ég er komin með miða í CCC sem að er stærsta hlaupið í þessari UTMB-seríu. Svo í lok ágúst þá er stærsta hlaupið í 100 kílómetra flokknum sem ég er að fókusera á. Ég er bara mjög þakklát fyrir þau fyrirtæki sem eru að styðja við bakið á mér og gera mér kleift að geta verið að sinna sportinu mínu og ég er með dásamlega þjálfara. Ég er í fjallahlaupaþjálfun og á bara mjög gott samband við Tobba, þjálfara minn, og við tölum saman nánast daglega sem er bara alveg ómetanlegt og hann hjálpar mér alveg ótrúlega mikið.“