Hægt að hitta handboltahetjurnar í dag

Landsliðið náði besta árangri sínum á stórmóti í 16 ár þegar liðið hafnaði í fjórða sæti á EM í Danmörku, Noregi og Svíþjóð í janúar síðastliðnum.

Þar vann liðið til að mynda magnaðan átta marka sigur á Svíþjóð í Malmö sem skaut liðinu áfram í undanúrslit mótsins. Svíar koma því sárir og í hefndarhug til Íslands eftir að strákarnir okkar köstuðu þeim úr keppni á heimavelli.

Uppselt er á leik Íslands við Svíþjóð í Kaplakrika klukkan 17:00 á laugardaginn en örfáir miðar eru lausir á fyrri leikinn að Hlíðarenda klukkan 19:30 á fimmtudagskvöldið.

Aðdáendur liðsins geta hitt allar stjörnurnar í Smáralind í Kópavogi í dag og fengið áritanir og ljósmyndir með leikmönnum. Viðburðurinn er klukkan 16:30.