Khamenei heitir því að halda Hormússundi lokuðu

Hinn 56 ára æðstiklerkur hét því að gefast ekki upp fyrir Bandaríkjunum og Ísrael en kallaði eftir því að nágrannar Íran lokuðu bandarískum herstöðvum þar.

Þetta er meðal þess sem kom fram í yfirlýsingu frá nýja æðstaklerkinum sem lesin var upp í ríkissjónvarpi Íran og birt á netinu. Khamenei, sem er sagður hafa særst skömmu eftir að Bandaríkjamenn og Ísraelar hófu árásir sínar á Íran, hefur ekki sést opinberlega síðan þá.

Ekki er útskýrt af hverju hann las ekki sjálfur yfirlýsinguna.

Faðir hans, eiginkona og dóttir dóu öll í upphafi árásanna. Ein af systrum hans féll einnig, auk annarra fjölskyldumeðlima og sagði Khamenei að þessi dauðsföll hefðu aukið á staðfestu hans í að standa í hárinu á andstæðingum Íran.

Sjá einnig: Mojtaba Khamenei særður en ó­hultur

Í yfirlýsingunni segir Khamenei að Íranar muni halda áfram að ráðast á skip á Hormússundi en verulega hefur dregið úr ferðum olíuflutningaskipa og annarra skipa um hafsvæðið síðan stríðið hófst.

Rúmur fimmtungur allrar olíu heimsins fer þar um og hefur olíuverð hækkað töluvert vegna stríðsins.

Æðstiklerkurinn sagði einnig til skoðanir að opna nýjar vígstöðvar gegn Bandaríkjunum og Ísrael, þar sem þau ríki séu viðkvæm.

Þá sagði hann að Íranir myndu hefna fyrir þá sem hefðu fallið þar í landi í árásunum og vísaði sérstaklega til stúlkna í skóla sem sprengdur var, að virðist af Bandaríkjamönnum, snemma í stríðinu.

Ummæli hans þykja, samkvæmt AP fréttaveitunni, gefa til kynna að Khamenei hafi áhuga á að ýta undir hryðjuverkastarfsemi gegn Bandaríkjunum.