Samninga­við­ræður Snorra við HSÍ standa enn yfir: „Ég er alltaf bjart­sýnn“

Á blaðamannafundi í gær tilkynnti Snorri íslenska hópinn fyrir vináttulandsleikina gegn Svíþjóð 19. og 21. mars. Jafnframt var greint frá því að Ísland myndi mæta Egyptalandi alls fjórum sinnum á næstu mánuðum, fyrst tvisvar ytra í maí og svo tvisvar hér á landi fyrir heimsmeistaramótið í byrjun næsta árs.

Ísland tryggði sér sæti á HM í Þýskalandi 2027 með því að ná góðum árangri á EM í janúar. Snorri segir gott að geta skipulagt sig fram í tímann.

„Það bara gefur helling og ég finn það alveg. Það gefur ró og fyrirsjáanleika og líka tækifæri sem við þurfum að fara vel með og nýta. Það að við séum líka komnir með allavega sex leiki á móti frábærum þjóðum og heimsklassaliðum er gríðarlega gott og við erum að máta okkur við þá bestu. Svo verður bara að koma í ljós bara hvað þetta gerir fyrir okkur en ég er alla vega mjög ánægður með þetta,“ sagði Snorri í samtali við íþróttadeild eftir blaðamannafundinn í gær.

Tekur tíma að ná sér niður

En hvernig hafa vikurnar frá því Evrópumótinu lauk verið fyrir landsliðsþjálfarann?

„Þær hafa bara verið þokkalegar. Það tekið alltaf smá tíma að ná sér niður og melta þetta allt og ég er ef eitthvað er líka bara enn svolítið í þeim fasa,“ sagði Snorri.

„Það kannski litast líka aðeins af því að við erum ekki að fara í háa C-ið og það er meiri ró yfir hlutunum. Þannig að ég er ennþá þar en annars bara nokkuð brattur.  Þessi gluggi kemur heldur fljótt eftir mót og það er yfirleitt þannig. En það er mjög gaman að fá þessa leiki og ég tala nú ekki um að fá þá hérna á heimavelli eftir mikið hæp í kringum liðið, þá er það mjög skemmtilegt.“

Snorri ákvað snemma að velja sinn sterkasta hóp fyrir leikina gegn Svíþjóð. Landsliðsfyrirliðinn Ómar Ingi Magnússon verður þó ekki með í leikjunum þar sem kona hans á von á barni á næstu dögum. 

Vilja þakka fyrir sig

Snorri segir að hann muni frekar nýta leikina gegn Egyptalandi í maí til að prófa sig áfram þótt hann vilji alls ekki tala um tilraunamennsku í því samhengi.

„Já, ég ákvað allavega mjög fljótt með þennan glugga. Eftir árangurinn á EM og áhugann og stemninguna sem var í kringum liðið þá fannst mér það bara einhvern veginn eðlilegast og rökrétt að velja mitt besta lið. Bæði það að stuðningsfólkið gæti séð þá stráka sem voru á EM, og eru að mínu mati okkar bestu handboltamenn, og eins bara fyrir strákana að koma og spila fyrir framan þessa áhorfendur og þakka fyrir sig. Þannig að það var strax ljóst,“ sagði Snorri.

„Varðandi hinn gluggann þá í maí finnst mér óþarfi að tala um þetta sem einhvern tilraunaglugga. Ég kem til með að velja alvöru lið og við erum að fara að spila á móti alvöru þjóð sem við þurfum að nýta vel og gera eitthvað. En auðvitað kemur maður til með að taka stöðuna þar og nálgast kannski gluggana að einhverju leyti aðeins öðruvísi. Það verður langt liðið á mótið eða tímabilið hjá öllum leikmönnum og eins og ég þekki verður alls konar stand á mönnum og við þurfum bara að taka stöðuna þar. Þetta er kannski ekki tilraunaverkefni en ég get prófað hluti þar.“

Þráðurinn er fínn

Núgildandi samningur Snorra við HSÍ rennur út á næstunni og viðræður hans við HSÍ um nýjan samning standa enn yfir.

„Þær eru bara í gangi og kannski ekkert mikið meira um það að segja. Maður tjáir sig kannski ekki um það sem stendur í samningnum, heldur ekki viðræðurnar. HSÍ og umboðsmaðurinn minn sem eru bara í því og svo verðum við bara að sjá hvernig það þróast á næstu dögum og vikum,“ sagði Snorri.

En er hann bjartsýnn á að allt gangi eftir?

„Ég er alltaf bjartsýnn, svona í lífinu almennt nema þegar þráðurinn styttist en hann er bara fínn eins og er,“ sagði Snorri og játaði því að það væri hans vilji að halda áfram með landsliðið sem hann hefur stýrt frá sumrinu 2023.