Russell á ráspól en Verstappen klessti út í kant

Nýi Mercedes bíllinn er greinilega öflugur í ár og í morgun sýndu Russell og Antonelli almennilega frá því í fyrsta sinn.

Óvíst var með þátttöku unga Ítalans Antonelli sem klessti bílinn á æfingu í gær en það tókst að laga hann í tæka tíð. Antonelli náði besta tíma dagsins áður en Russell fór hringinn.

Þá lenti margfaldi heimsmeistarinn Max Verstappen í vandræðum og klessti út í vegg. Liðsfélagi hans hjá Red Bull, Isack Hadjar, átti hins vegar eftir að ná þriðja besta tímanum.

Verstappen hefur áður sagt að hann sé ekki beint hrifinn af breytingunum á bílunum sem tóku gildi á þessu tímabili. Smærri, léttari og meira rafdrifnir bílar heilla hann ekki.

Lewis Hamilton hefur hins vegar liðið vel í nýja Ferrari bílnum en hann náði sjöunda besta tíma dagsins.