Kæru vegna gisti­hýsa við þjóð­garðinn í Skafta­felli vísað frá

Ferðaþjónustufyrirtækið Arctic Circle Hotels reisti þrettán gistihýsi á jörðunum sem eru á milli þjóðvegarins og Skaftafells í Vatnajökulsþjóðgarði. Heimild er til þess að byggja allt að sjötíu slík hús á tveimur jörðum: Skaftafelli III og IV.

Landeigendur og ábúendur í Öræfum sem voru ósáttir við framkvæmdirnar kærðu ákvörðun byggingarfulltrúa sveitarfélagsins Hornafjarðar um að samþykkja uppbygginguna til úrskurðarnefndarinnar í janúar.

Krafðist hópurinn þess að ákvörðunin yrði felld úr gildi en til vara að gistihýsunum verði fækkað og þau lækkuð. Vildi hann jafnframt að framkvæmdirnar yrðu stöðvaðar tímabundið.

Of langt í burtu og óbeinir fjárhagslegir hagsmunir dugðu ekki til

Byggðu kærendurnir meðal annars á því að þó að jarðir þeirra lægju ekki að byggingarsvæðinu þá hefðu þeir mjög gott útsýni yfir þjóðgarðinn frá bæjarstæðum sínum. Gistihýsaþyrpingin hefði því veruleg áhrif á útsýnið. Töldu þeir þetta hafa áhrif á verðgildi fasteigna sinna.

Vísuðu þeir einnig til þess að þeir rækju allir nema einn gistiþjónustu fyrir ferðamenn og því hefði uppbygging allt að sjötíu gistihýsa veruleg áhrif á hagsmuni þeirra.

Úrskurðarnefndin gaf lítið fyrir þau rök. Jarðir kærenda væru allar í töluverðri fjarlægð frá gistihúsabyggðinni. Sú sem væri næst væri í sex kílómetra fjarlægð og á milli hennar og þjóðgarðsins væri nú þegar hótel, veitingastaður og ýmis önnur hús í Freysnesi.

Vegna fjarlægðar taldi nefndin að hagsmunir kærenda ættu ekki eftir að skerðast á nokkurn hátt við uppbygginguna hvað varðaði skuggavarp, landnotkun og innsýn. Þótt nokkurra sýndaráhrifa gætti á svæðinu gætu kærendurnir ekki talist eiga verulega hagsmuni undir sem skapaði þeim aðild til þess að kæra framkvæmdinar í ljósi fjarlægðarinnar.

Þá hafnaði nefndin rökum kærendanna um að gistirekstur þeirra skapaði þeim aðild að málinu. Þeir óbeinu fjárhagslegu eða samkeppnislegu hagsmunir leiddu almennt ekki til kæruaðildar í stjórnsýslurétti.