Óðinn Svan leiðir L-listann

Akureyri.net greinir frá framboðinu en fyrr í dag sagði Óðinn frá því að hann væri hættur hjá Rúv eftir tæplega sjö ára starf fyrir ríkismiðilinn. Þegar Vísir náði tali af honum í dag vildi Óðinn ekki gefa upp sín næstu skref, en það kæmi í ljós mjög fljótlega.

L-listi Bæjarlistans á Akureyri hlaut flest atkvæði í síðustu sveitarstjórnarkosningum 2022, eða um 18,7 prósent og hefur því þrjá bæjarfulltrúa af 11. 

Halla Björk Reynisdóttir hefur gefið það út að hún gefur ekki kost á sér áfram, en skipaði þriðja sæti listans síðustu kosningnum en færðist upp í oddvitasætið þar sem forverar hennar sögðu báðir af sér á kjörtímabilinu.

L-listi Bæjarlista Akureyrar varð til árið 2014 við sameiningu L-lista fólksins og A-lista Bæjarlistans. Síðan þá hefur L-listinn verið í meirihlutasamstarfi og myndaði hann meirihluta með fulltrúum Sjálfstæðisflokks og Miðflokks í síðustu kosningum.

Fréttin hefur verið uppfærð.