Byrja að fljúga til Tromsø og oftar til Bergen

Í tilkynningu segir að einnig verði flugtímabil til Bergen framlengt og verði nú flogið þangað allt árið. 

„Með viðbótinni verður flugáætlunin á milli Íslands og Noregs sú umfangsmesta í sögu Icelandair.

Tromsø er áfangastaður fyrir náttúru- og norðurljósaunnendur og hefur notið vaxandi vinsælda í Norður-Ameríku. Þessi nýja flugleið Icelandair mun efla tengingar bæði frá Norður-Ameríku til Noregs og Noregi til Norður-Ameríku. Eitt af markmiðunum með flugleiðinni er að markaðssetja viðdvöl á Íslandi fyrir ferðamönnum vestanhafs og bjóða þannig tvo áfangastaði fyrir einn, Ísland og Norður-Noreg.

Icelandair á í samstarfi við norska flugfélagið Widerøe, en í gegnum Bergen og Tromsø bjóða flugfélögin tvö upp á tengingar við alla helstu flugvelli í Noregi,“ segir í tilkynningunni. 

Haft er eftir Boga Nils Bogasyni, forstjóra Icelandair, að flug til Tromsø opni marga spennandi möguleika. „Nú er auðveldara fyrir Íslendinga sem búa í Norður-Noregi og Norðmenn sem búa á Íslandi að komast til heimahaganna, auk þess sem við opnum frábærar tengingar á milli Norður-Ameríku og Norður-Noregs. Íbúar í Norður-Noregi eiga þannig auðveldara með að komast til fjölda áfangastaða okkar í Norður-Ameríku og sömuleiðis opnast þægilegar tengingar úr vestri um Íslands til norðurhluta Noregs,“ segir Bogi Nils.