„Gagn­rýnin og við­bjóðurinn aldrei verið meiri“

Björgvin Páll er nú kominn heim og byrjaður að spila með Val í Olís-deildinni. Hann er nú búinn að melta nítjánda stórmótið sitt og skrifaði uppgjörspistil á samfélagsmiðla.

„Þegar maður sér EM úr nokkurra daga fjarlægð, gangandi um götur Reykjavíkur og takandi við hamingjuóskum þá þarf ég að koma frá mér EM-uppgjöri. Fyrir mig til að byrja með og kannski fyrir þig kæri lesandi. Mitt nítjánda en líklega mesta krefjandi mót að mörgu leyti, andlega, ekki líkamlega. Rússíbani sem innihélt frábærar frammistöður, dottnir út á miðju móti, síðan enn á lífi, komast í undanúrslit og enda síðan í 4. sæti. Þetta mót hafði upp á allt að bjóða,“ skrifaði Björgvin.

„Persónulega hefði ég viljað gera meira gagn“

Björgvin átti ekki gott mót, fékk lítið að spila og varði ekki marga bolta þegar hann fékk tækifærið. Hann átti þó sinn besta leik undir lok mótsins og hjálpaði íslenska liðinu að koma sér aftur inn í bronsleikinn.

„Persónulega hefði ég viljað gera meira gagn innan vallar og spila stærra hlutverk en á sama tíma geri ég mér grein fyrir mínu hlutverki í þessu liði, á þessum tímapunkti, og er þakklátur fyrir það. Þrátt fyrir fáar spilaðar mín hefur gagnrýnin og viðbjóðurinn aldrei verið meiri. Það er eitthvað sem ég elska,“ skrifaði Björgvin.

Elskar að leita uppi fólk sem hefur ekki trú á honum

„Ég elska að leita uppi fólk sem hefur ekki trú á mér og mínum. Það gefur mér orku og kraft til að halda áfram. Það sem var kannski öðruvísi núna en oft áður var að ég fékk ekki mörg tækifæri til þess að losa um þessa orku eða skila henni í vörðum boltum,“ skrifaði Björgvin.

Hann nefnir líka börnin sín sem eru núna orðin eldri og meira með á nótunum.

„Það sem situr líka eftir er að börnin mín eru komin á þann aldur að þau sjá þessa hluti sem um mann eru skrifaðir og sagðir. Það er held ég rosalega merkilegur skóli að upplifa slíka hluti. Sú þjáning gerði það til að mynda að verkum að elsta dóttir mín deildi mynd af mér sem á stóð „For my hero I chose my dad“. Eitthvað sem hreyfði mikið við mér,“ skrifaði Björgvin.

Pínu svekktur en stoltur

„Stórmóti sem ég geng frá pínu svekktur en stoltur og „enn og aftur hef ég eitthvað til að sanna, eins og lögmaður“ eins og einn af mínum uppáhalds listamönnum, Saint Pete, myndi orða það. Takk fyrir allan stuðninginn, gagnrýnina og ástríðuna,“ skrifaði Björgvin eins og sjá má hér fyrir neðan.