Sömu og dæmdu í sigrinum á Svíum en fyrst dæma Ís­lendingar

Þannig verður til að mynda íslenskt dómarapar á ferðinni í Boxen í dag á Evrópumótinu í handbolta. Hins vegar fær norskt par það verkefni að dæma leik Íslands og Danmerkur í kvöld.

Dagskráin í Boxen hefst á leik um 5. sæti mótsins, á milli Portúgals og Svíþjóðar en þessi lið enduðu í 3. sæti í sínum milliriðlum. Það verða þeir Jónas Elíasson og Anton Gylfi Pálsson sem dæma leikinn sem að þessu sinni snýst aðeins um 5. sætið en er stundum leikur um HM-farseðil. Bæði lið eru nú þegar örugg um HM-farseðilinn.

Slóvenarnir Bojan Lah og David Sok dæma svo slag Þýskalands og Króatíu, sem hefst klukkan 16:45 að íslenskum tíma, þar sem þjálfararnir Dagur Sigurðsson og Alfreð Gíslason mætast.

Klukkan 19:30 hefst leikur Íslands og Danmerkur og þar verður norræna þemað fullkomnað með norsku dómarapari, þeim Lars Jørum og Håvard Kleven.

Þeir dæmdu einmitt einnig leik Íslands og Svíþjóðar á sunnudaginn, þar sem Ísland fagnaði öruggum átta marka sigri.

EHF hefur svo þegar gefið út hverjir munu dæma lokaleiki mótsins, á sunnudaginn. Spánverjarnir Ignacio Garcia og Andreu Marín dæma leikinn um bronsverðlaunin, klukkan 14:15 að íslenskum tíma, og þeir Milos Raznatovic og Ivan Pavicevic frá Svartfjallalandi dæma svo úrslitaleikinn klukkan 17.