Ís­lenskur tón­listar­maður í lykil­hlut­verki

Bjarni Biering á óvæntan þátt í endurvakningu Arcane Roots, einnar þekktustu jaðarrokkhljómsveitar Bretlands. Sveitin hefur nú snúið aftur eftir rúmlega sjö ára hlé með nýju lagi, alþjóðlegri umfjöllun og stórum tónleikabókunum sumarið 2026.

Örlagaríkt á Íslandi

Bjarni flutti aftur til Íslands árið 2019 eftir átta ár í Bretlandi. Sama ár flutti Andrew Groves, söngvari og gítarleikari Arcane Roots, einnig til landsins. 

Tilviljun réði því að þeir urðu stúdíónágrannar í sameiginlegu vinnurými á Granda í Reykjavík, aðeins nokkrum vikum áður en heimsfaraldur kóvid-19 setti tónleikahald og stóran hluta tónlistarlífsins á ís.

Samstarfið hófst algjörlega óplanað. Strákarnir hittust daglega, ræddu tónlist og unnu saman í rólegheitum. Smám saman varð ljóst að þar var eitthvað stórt þarna að fæðast.

„Við vorum ekki að leita að einhverri endurkomu,“ segir Bjarni. „Við vorum bara að vinna saman og fylgja því sem var að gerast.“

Áttu erindi út í heim aftur

Arcane Roots höfðu lagt starfsemi sína á hilluna árið 2018 eftir áralangan feril, mikla tónleikavinnu og þrjár útgáfur sem nutu mikillar virðingar innan jaðartónlistarsenunnar í Bretlandi.

Samstarf Andrew og Bjarna varð að lokum kveikjan að því að sveitin tók aftur höndum saman, nú í breyttri mynd. 

Með endurvakningunni snýr hljómsveitin aftur sem fimm manna sveit, þar á meðal er stofnmeðlimurinn Daryl Atkins, sem snýr aftur eftir fjarveru.

„Þetta byrjaði bara sem einhver forvitni,“ segir Andrew. „Eftir því sem leið á varð ómögulegt að horfa fram hjá því að við vorum komin með eitthvað sem átti erindi aftur út í heim.“

Frumsýnt á BBC

Fyrsta afurð þessa nýja kafla er lagið A Wave, Across The Sea, sem kom út 27. janúar. Lagið var frumflutt á BBC Radio 1 Rock Show og markar fyrstu nýju útgáfu sveitarinnar síðan 2018. 

Um er að ræða sex mínútna langt lag sem þróast stöðugt og forðast hefðbundið lagform, í takt við þann metnað sem Arcane Roots hefur verið þekkt fyrir. Hér má sjá myndbandið: 

„Viðtökurnar hafa verið frábærar. Lagið situr ný í 7. sæti á iTunes Alternative Music Top10 listanum yfir seldar niðurhöl, hljómsveitin prýðir forsíðu Upset Magazine, og hefur jafnframt fengið umfjöllun í Kerrang! og NME.“

Engin nostalgía bara framþróun

Samhliða útgáfunni hefur Arcane Roots verið tilkynnt sem aðalatriði á 2000trees Festival í Bretlandi þann 10. júlí, auk þess sem sveitin kemur fram á ArcTanGent Festival í lok ágúst. 

Um er að ræða fyrstu tónleika sveitarinnar í langan tíma og markar þetta formlega endurkomu hennar á svið.

„Endurvakning Arcane Roots á rætur sínar að rekja til tilviljunar og tíma sem gaf svigrúm til að skapa án utanaðkomandi þrýstings. 

Úr varð nýr kafli sem var ekki knúinn áfram af nostalgíu, heldur af sameiginlegri þörf fyrir að gera hlutina aftur, á eigin forsendum,“ segja strákarnir að lokum.

Hér má hlusta á Arcane Roots á streymisveitunni Spotify.