Þarf að beisla Einar aðeins en líst vel á samstarfið

Ágúst Orri Arnarson skrifar 21. janúar 2026 15:30

Elliði Snær Viðarsson var í stærra varnarhlutverki í gær en hann gerði ráð fyrir. sýn skjáskot

Elliði Snær Viðarsson og Einar Þorsteinn Ólafsson voru óvænt í mjög stóru varnarhlutverki í leik Íslands gegn Ungverjalandi á EM í handbolta í gærkvöldi. Elliði lýsir Einari sem frekar villtum leikmanni, sem tekur mikið pláss, en líst ljómandi vel á samstarfið.

Létt var yfir landsliðsmönnum í morgun eftir að hafa loksins lagt Ungverjana að velli, en íslenska liðið varð líka fyrir miklu áfalli. Elvar Örn Jónsson braut bein í handarbaki og hefur lokið leik á mótinu.

„Þetta er mikið sjokk bara“ sagði Elliði Snær Viðarsson í viðtali við Henry Birgi Gunnarsson í morgun.

„Elvar hefur verið burðarás í vörninni og sókninni hjá okkur. Klárlega einn af okkar mikilvægustu mönnum, þannig að það er mikið sjokk og auðvitað bara leiðinlegast fyrir hann að vera dottinn út úr mótinu. Þetta þykir okkur öllum mjög leiðinlegt.“

Alls ekki planið fyrir fram

Þegar Elvar þurfti að fara af velli vegna meiðslanna kom Einar Þorsteinn Ólafsson inn í hans stað. Ýmir Örn Gíslason fékk síðan rautt spjald skömmu síðar og þá tók Elliði hans hlutverk í vörninni að sér. Elliði og Einar mynduðu því, mjög öflugt, varnartvíeyki fyrir íslenska liðið í seinni hálfleik.

„Við höfum náttúrulega tekið einhverjar æfingar saman en það var ekki beint leikplanið fyrir fram að ég og Einar myndum standa þarna í vörninni, en það var kannski bara fínt að fá þetta svona án þess að undirbúa sig. Það tók smá tíma fyrir Einar að komast í takt við leikinn en eftir það var hann gjörsamlega frábær.“

Munu standa vörnina í milliriðlinum

Fjórir leikir í milliriðlinum í Malmö eru nú fram undan og væntanlega munu íslenskir áhorfendur fá að sjá meira af þeirra samvinnu á mótinu. Elliða líst vel á samstarfið.

„Mjög gott [að spila með honum]. Hann er villtur, maður þarf að reyna að beisla hann svolítið, en hann tekur líka mikið pláss. Maður þarf svolítið að læra inn á hann en hann tekur rosa mikið pláss og það gerir lífið léttara fyrir mig í staðinn… Fyrst Elvar er dottinn út þurfum við að fá Einar og Arnar [Frey Arnarsson] meira inn í vörnina. Við þurfum að vera fljótir að finna hvað virkar og aðrir þurfa að stíga upp í staðinn.“

Klippa: Elliði um óvænta samstarfið með Einari Þorsteini

Nánar verður rætt við hinn handarbrotna Elvar Örn Jónsson í Sportpakka Sýnar í kvöld en viðtalið við Elliða Snæ má sjá í spilaranum að ofan.

Næsti leikur Íslands verður gegn Svíþjóð eða Króatíu á föstudaginn kemur.

Landslið karla í handbolta EM karla í handbolta 2026